ਸ੍ਰੀ ਮੁਕਤਸਰ ਸਾਹਿਬ, 1 ਅਕਤੂਬਰ 2020-13 ਸਤੰਬਰ ਤੱਕ ਕੇਂਦਰ ਸਰਕਾਰ ਵੱਲੋਂ ਪਾਸ ਕੀਤੇ ਗਏ ਖੇਤੀ ਆਰਡੀਨੈਂਸਾਂ ਦੇ ਹੱਕ ਵਿੱਚ ਬੋਲਣ ਤੋਂ ਬਾਅਦ ਭਾਵੇਂ ਸੁਖਬੀਰ ਸਿੰਘ ਬਾਦਲ ਤੇ ਹਰਸਿਮਰਤ ਕੌਰ ਬਾਦਲ ਅਚਾਨਕ ਪੈਂਤੜਾ ਬਦਲ ਕੇ ਇੰਨ੍ਹਾਂ ਬਿੱਲਾਂ ਦੇ ਵਿਰੋਧ ਵਿੱਚ ਆ ਗਏ ਹਨ, ਪਰ ਸ਼ੋ੍ਰਮਣੀ ਅਕਾਲੀ ਦਲ ਦੇ ਸਰਪ੍ਰਸਤ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ 3 ਸਤੰਬਰ ਨੂੰ ਇੰਨ੍ਹਾਂ ਆਰਡੀਨੈਂਸਾਂ ਦੇ ਹੱਕ ਵਿੱਚ ਜਾਰੀ ਵੀਡਿਓ ਤੋਂ ਬਾਅਦ ਕੋਈ ਬਿਆਨ ਨਹੀਂ ਦਿੱਤਾ ਗਿਆ। ਖ਼ਾਸ ਕਰਕੇ ਇੰਨ੍ਹਾਂ ਖੇਤੀ ਕਾਨੂੰਨਾਂ ਬਾਰੇ ਅਕਾਲੀ ਦਲ ਵੱਲੋਂ ਲਏ ਮੋੜੇ ਤੋਂ ਬਾਅਦ ਵੀ ਜਦੋਂ ਬਾਦਲ ਜੋੜੇ ਨੇ ਡੰਕੇ ਦੀ ਚੋਟ ’ਤੇ ਇੰਨ੍ਹਾਂ ਬਿੱਲਾਂ ਨੂੰ ਕਿਸਾਨ ਮਾਰੂ ਕਹਿਣਾ ਸ਼ੁਰੂ ਕਰ ਦਿੱਤਾ ਅਤੇ ਹਰਸਿਮਰਤ ਕੌਰ ਬਾਦਲ ਨੇ ਕੇਂਦਰ ਦੇ ਮੰਤਰੀ ਮੰਡਲ ਤੋਂ ਅਸਤੀਫ਼ਾ ਦੇ ਦਿੱਤਾ ਤੇ 27 ਸਤੰਬਰ ਨੂੰ ਸੁਖਬੀਰ ਸਿੰਘ ਬਾਦਲ ਨੇ ਐਨਡੀਏ ਨਾਲੋਂ ਨਾਤਾ ਤੋੜਣ ਦਾ ਐਲਾਨ ਕਰ ਦਿੱਤਾ। ਨਾਤਾ ਤੋੜਣ ਤੋਂ ਬਾਅਦ ਵਿਰੋਧੀ ਪਾਰਟੀਆਂ ਨੇ ਇਸ ਤੋੜ ਵਿਛੋੜੇ ਨੂੰ ਅਕਾਲੀ ਦਲ ਦੀ ਮਜ਼ਬੂਰੀ ਦੱਸਿਆ ਸੀ।
ਵਿਰੋਧੀ ਧਿਰਾਂ ਦਾ ਕਹਿਣਾ ਸੀ ਕਿ ਹਰਸਿਮਰਤ ਕੌਰ ਬਾਦਲ ਵੱਲੋਂ ਦਿੱਤੇ ਅਸਤੀਫ਼ੇ ’ਤੇ ਭਾਜਪਾ ਨੇ ਗੰਭੀਰਤਾ ਨਾਲ ਨਾ ਲੈ ਕੇ ਉਨ੍ਹਾਂ ਦਾ ਅਸਤੀਫ਼ਾ ਮਨਜ਼ੂਰ ਕਰਕੇ ਮਹਿਕਮਾ ਨਰਿੰਦਰ ਸਿੰਘ ਤੋਮਰ ਨੂੰ ਦੇ ਦਿੱਤਾ, ਪਰ ਮਨਪ੍ਰੀਤ ਸਿੰਘ ਬਾਦਲ ਦਾ ਕਹਿਣਾ ਸੀ ਕਿ 25 ਦੀ ਲੰਬੀ ਰੈਲੀ ਵਿੱਚ ਸੁਖਬੀਰ ਬਾਦਲ ਵੱਲੋਂ ਪ੍ਰਧਾਨ ਮੰਤਰੀ ਮੋਦੀ ਉਪਰ ਅਸਤੀਫ਼ਾ ਬੰਬ ਸੁੱਟਣ ਦੇ ਬਿਆਨ ਤੋਂ ਖ਼ਫ਼ਾ ਹੋ ਕੇ ਭਾਜਪਾ ਨੇ ਅਕਾਲੀ ਦਲ ਨਾਲੋਂ ਨਾਤਾ ਤੋੜਣ ਦਾ ਐਲਾਨ ਕਰਨਾ ਸੀ, ਪਰ ਇਸਦੀ ਜਾਣਕਾਰੀ ਮਿਲਣ ’ਤੇ ਸੁਖਬੀਰ ਬਾਦਲ ਨੇ ਸ਼ਾਮ ਨੂੰ ਹੀ ਕੋਰ ਕਮੇਟੀ ਦੀ ਮੀਟਿੰਗ ਕਰਕੇ ਪਹਿਲਾਂ ਹੀ ਤੋੜ ਵਿਛੋੜਾ ਕਰਨ ਦਾ ਐਲਾਨ ਕਰ ਦਿੱਤਾ।
ਉਧਰ ਤੋੜ ਵਿਛੋੜੇ ਤੋਂ 4 ਦਿਨ ਲੰਘ ਜਾਣ ’ਤੇ ਵੀ ਸੀਨੀਅਰ ਬਾਦਲ ਵੱਲੋਂ ਕੋਈ ਬਿਆਨ ਨਹੀਂ ਦਿੱਤਾ ਗਿਆ। ਭਾਵੇਂ ਪ੍ਰਕਾਸ਼ ਸਿੰਘ ਬਾਦਲ ਕਰੀਬ 10-12 ਦਿਨ ਆਪਣੇ ਫਾਰਮ ’ਚ ਆਰਾਮ ਫ਼ਰਮਾ ਰਹੇ ਸਨ, ਪਰ ਇਹ ਨਹੀਂ ਹੋ ਸਕਦਾ ਕਿ ਸਾਰੀ ਸਥਿਤੀ ਉਪਰ ਉਨ੍ਹਾਂ ਦੀ ਨਜ਼ਰ ਨਾ ਹੋਵੇ। ਹੁਣ ਸੋਮਵਾਰ ਸ਼ਾਮ ਤੋਂ ਸਾਬਕਾ ਮੁੱਖ ਮੰਤਰੀ ਆਪਣੀ ਬਾਦਲ ਰਿਹਾਇਸ਼ ’ਤੇ ਵਾਪਿਸ ਆ ਗਏ ਹਨ, ਪਰ ਅਜੇ ਤੱਕ ਉਨ੍ਹਾਂ ਵੱਲੋਂ ਇਸ ਸਬੰਧੀ ਕੋਈ ਬਿਆਨ ਨਹੀਂ ਦਿੱਤਾ ਗਿਆ। ਸਿਆਸੀ ਜਾਣਕਾਰੀ ਦਾ ਕਹਿਣਾ ਹੈ ਕਿ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਕਦੇ ਇਸ ਨੂੰ ਨੂੰਹ-ਮਾਸ ਵਾਲਾ ਰਿਸ਼ਤਾ ਦੱਸਿਆ ਜਾਂਦਾ ਸੀ, ਐਨਾ ਹੀ ਨਹੀਂ ਇਹ ਵੀ ਕਿਹਾ ਜਾਂਦਾ ਸੀ ਕਿ ਜਿੰਨ੍ਹੀ ਦੇਰ ਜ਼ਿੰਦਗੀ ਹੈ, ਉਨੀ ਦੇਰ ਉਹ ਭਾਜਪਾ ਨਾਲੋਂ ਸਾਂਝ ਨਹੀਂ ਤੋੜਣਗੇ, ਪਰ ਸਿਆਸਤ ਵਿੱਚ ਸਭ ਕੁੱਝ ਸੰਭਵ ਹੋਣ ਵਾਂਗ ਇਹ ਰਿਸ਼ਤਾ ਟੁੱਟ ਗਿਆ ਹੈ।
ਕੁੱਝ ਜਾਣਕਾਰਾਂ ਦਾ ਕਹਿਣਾ ਹੈ ਕਿ ਸੁਖਬੀਰ ਬਾਦਲ ਦੇ ਕੇਂਦਰ ਸਰਕਾਰ ਨਾਲੋਂ ਨਾਤਾ ਤੋੜਣ ਤੇ ਬਿਆਨ ਦਾਗਣ ਤੋਂ ਬਾਅਦ ਵੀ ਵੱਡੇ ਬਾਦਲ ਆਪਣੇ ਕੱਦ ਅਨੁਸਾਰ ਬਿੱਲਾਂ ਦੇ ਹੱਕ ਵਿੱਚ ਦਿੱਤੇ ਬਿਆਨਾਂ ਨੂੰ ਪਲਟਣਾ ਨਹੀਂ ਚਾਹੁੰਦੇ ਜਾਂ ਫ਼ਿਰ ਬਾਦਲ ਪਰਿਵਾਰ ਨੇ ਉਨ੍ਹਾਂ ਨੂੰ ਭਾਜਪਾ ਨਾਲ ਮੁੜ ਸਬੰਧਾਂ ਦੀ ਵਾਪਸੀ ਵਿੱਚ ਇੱਕ ਗੁੰਜਾਇਸ਼ ਵਜੋਂ ਰੱਖ ਲਿਆ ਹੋਵੇ। ਉਂਝ ਇਹ ਵੀ ਸਮਝਿਆ ਜਾ ਰਿਹਾ ਹੈ ਕਿ ਅੱਜ 1 ਅਕਤੂਬਰ ਨੂੰ ਤਿੰਨ ਤਖ਼ਤਾਂ ਤੋਂ ਅਕਾਲੀ ਦਲਾਂ ਦੇ ਜਥੇ ਤੁਰਨ ਤੋਂ ਪਹਿਲਾਂ ਹਰਸਿਮਰਤ ਤੇ ਸੁਖਬੀਰ ਜਦੋਂ ਘਰੋਂ ਜਾਣਗੇ ਤਾਂ ਬਾਦਲ ਸਾਬ੍ਹ ਇਸ ਮੌਕੇ ਕੋਈ ਬਿਆਨ ਦੇ ਦੇਣ।
