ਉੱਤਰਾਖੰਡ ਵਿੱਚ ਬੱਦਲ ਫਟਣ ਕਾਰਨ 3 ਵਿਅਕਤੀਆਂ ਦੀ ਮੌਤ, 8 ਲਾਪਤਾ

ਪਿਥੌਰਾਗੜ੍ਹ, 20 ਜੁਲਾਈ-ਉੱਤਰਾਖੰਡ ਦੇ ਪਿਥੌਰਾਗੜ੍ਹ ਵਿੱਚ ਬੱਦਲ ਫਟਣ ਕਾਰਨ 3 ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ 8 ਵਿਅਕਤੀ ਲਾਪਤਾ ਦੱਸੇ ਜਾ ਰਹੇ ਹਨ| ਬੱਦਲ ਫਟਣ ਕਾਰਨ ਕਈ ਘਰ ਜ਼ਮੀਨਦੋਜ਼ ਹੋ ਗਏ| ਪਹਾੜ ਤੋਂ ਆਏ ਮਲਬੇ ਕਾਰਨ ਕਈ ਘਰ ਦੱਬੇ ਗਏ| ਇਸ ਦੇ ਨਾਲ ਹੀ ਇੱਥੇ ਪਾਣੀ ਦੇ ਵਹਾਅ ਕਾਰਨ ਕਈ ਲੋਕਾਂ ਦੇ ਵਹਿ ਜਾਣ ਦੀਆਂ ਖਬਰਾਂ ਵੀ ਹਨ| ਮੌਸਮ ਮਹਿਕਮੇ ਮੁਤਾਬਕ ਇੱਥੇ ਅਗਲੇ ਦੋ ਦਿਨਾਂ ਤੱਕ ਭਾਰੀ ਮੀਂਹ ਪਰੇਸ਼ਾਨੀ ਦਾ ਸਬੱਬ ਬਣ ਸਕਦਾ ਹੈ|
ਜਿਕਰਯੋਗ ਹੈ ਕਿ ਦੇਰ ਰਾਤ ਨੂੰ ਪਏ ਮੀਂਹ ਤੋਂ ਬਾਅਦ ਇੱਥੇ ਮੁਨਸਯਾਰੀ ਅਤੇ ਬੰਗਾਪਾਨੀ ਦੇ ਗੇਲਾ ਪਿੰਡ ਵਿੱਚ ਬੱਦਲ ਫਟਣ ਕਾਰਨ ਤਬਾਹੀ ਮਚ ਗਈ| ਕਈ ਘਰ ਦੇਖਦੇ ਹੀ ਦੇਖਦੇ ਜ਼ਮੀਨਦੋਜ਼ ਹੋ ਗਏ| 3 ਵਿਕਅਤੀਆਂ ਦੇ ਘਰ ਦੇ ਮਲਬੇ ਹੇਠਾਂ ਦੱਬਣ ਕਾਰਨ ਮੌਤ ਹੋ ਗਈ ਅਤੇ 3 ਹੋਰ ਜ਼ਖਮੀ ਹਨ| ਇਸ ਤੋਂ ਇਲਾਵਾ 8 ਲੋਕ ਲਾਪਤਾ ਹੋ ਗਏ| ਓਧਰ ਪਿਥੌਰਾਗੜ੍ਹ ਦੇ ਜ਼ਿਲ੍ਹਾ ਮੈਜਿਸਟ੍ਰੇਟ ਵੀ. ਕੇ. ਜੋਗਦੰਡੇ ਮੁਤਾਬਕ ਮਦਕੋਟ ਪਿੰਡ ਦੇ 3 ਲੋਕਾਂ ਨੇ ਆਪਣੀ ਜਾਨ ਗਵਾ ਦਿੱਤੀ, ਜਦਕਿ ਬੱਦਲ ਫਟਣ ਕਾਰਨ ਗੁਆਂਢੀ ਪਿੰਡ ਦੇ 8 ਲੋਕ ਲਾਪਤਾ ਹਨ| ਉਨ੍ਹਾਂ ਨੇ ਦੱਸਿਆ ਕਿ ਇਕ ਬਚਾਅ ਦਲ ਘਟਨਾ ਵਾਲੀ ਥਾਂ ਤੇ ਮੌਜੂਦ ਹੈ| ਉੱਤਰਾਖੰਡ ਵਿੱਚ ਭਾਰੀ ਮੀਂਹ ਪੈਣ ਕਾਰਨ ਨਦੀਆਂ ਉਫਾਨ ਤੇ ਹਨ| ਕਈ ਥਾਵਾਂ ਤੇ ਸੜਕਾਂ ਵਿੱਚ ਦਰਾਰ ਆ ਗਈ ਹੈ| ਮੌਸਮ ਮਹਿਕਮੇ ਨੇ ਉੱਤਰਾਖੰਡ ਦੇ ਹਰੀਦੁਆਰ ਪੌੜੀ ਗੜ੍ਹਵਾਲ, ਪਿਥੌਰਾਗੜ੍ਹ, ਨੈਨੀਤਾਲ ਅਤੇ ਬਾਗੇਸ਼ਵਰ ਵਿਚ ਭਾਰੀ ਮੀਂਹ ਦਾ ਆਰੇਂਜ ਅਲਰਟ ਜਾਰੀ ਕੀਤਾ ਹੋਇਆ ਹੈ| ਉੱਤਰਾਖੰਡ ਦੇ ਨਾਲ-ਨਾਲ ਦੂਜੇ ਪਹਾੜੀ ਸੂਬਿਆਂ ਹਿਮਾਚਲ ਪ੍ਰਦੇਸ਼ ਵਿੱਚ ਵੀ ਮੀਂਹ ਆਫਤ ਬਣ ਰਿਹਾ ਹੈ| ਕਈ ਥਾਵਾਂ ਤੇ ਜ਼ਮੀਨ ਖਿਸਕਣ ਦੀਆਂ ਖ਼ਬਰਾਂ ਹਨ|