ਔਕਲੈਂਡ, 23 ਜੂਨ 2020 – ਨਿਊਜ਼ੀਲੈਂਡ ਦੇ ਵਿੱਚ ਕੋਰੋਨਾ ਦੀ ਗਿਣਤੀ ਦੇ ਵਿੱਚ ਹੁਣ ਰੋਜ਼ਾਨਾ ਵਾਧਾ ਹੋਣ ਲੱਗਾ ਹੈ। ਅੱਜ ਜਾਰੀ ਹੋਏ ਪ੍ਰੈਸ ਬਿਆਨ ਵਿਚ ਦੱਸਿਆ ਗਿਆ ਕਿ ਦੋ ਹੋਰ ਨਵੇਂ ਕੇਸ ਆਏ ਹਨ। ਪਹਿਲਾ ਕੇਸ 20 ਸਾਲਾ ਭਾਰਤੀ ਨੌਜਵਾਨ ਦਾ ਹੈ ਜੋ 19 ਜੂਨ ਦੀ ਫਲਾਈਟ ਵਿਚ ਆਇਆ ਹੈ ਜਦ ਕਿ ਦੂਜਾ ਲਾਸ ਏਂਜਲਸ ਅਮਰੀਕਾ ਨਾਲ ਸਬੰਧ ਰੱਖਦਾ ਹੈ ਜੋ 18 ਜੂਨ ਨੂੰ ਆਇਆ ਹੈ। ਕੁੱਲ 11 ਕੇਸ ਬਣਦੇ ਹਨ ਪਰ ਇਕ ਠੀਕ ਹੋ ਗਿਆ ਹੈ ਅਤੇ ਹੁਣ ਐਕਟਿਵ ਕੇਸ 10 ਰਹਿ ਗਏ ਹਨ।
ਠੀਕ ਹੋਣ ਵਾਲੀ ਔਰਤ ਯੂ. ਕੇ. ਤੋਂ ਆਈ ਹੋਈ ਸੀ। ਭਾਰਤ ਤੋਂ ਆਏ ਇਸ ਨੌਜਵਾਨ ਨੂੰ ਜੈਟ ਪਾਰਕ ਹੋਟਲ ਦੇ ਵਿਚ ਭੇਜ ਦਿੱਤਾ ਗਿਆ ਹੈ। ਇਹ ਦੋਵੇਂ ਕੇਸ ਤੀਜੇ ਦਿਨ ਹੋਣ ਵਾਲੇ ਟੈਸਟਾਂ ਦੇ ਵਿੱਚ ਪਾਏ ਗਏ ਹਨ। ਸੋਮਵਾਰ ਨੂੰ ਕੁੱਲ 4303 ਟੈਸਟ ਪੂਰੇ ਕੀਤੇ ਗਏ ਸਨ। ਦੇਸ਼ ਭਰ ਵਿੱਚ ਹੁਣ ਤੱਕ ਮੁਕੰਮਲ ਹੋਏ ਟੈੱਸਟਾਂ ਦੀ ਗਿਣਤੀ 348,822 ਹੋ ਗਈ ਹੈ। ਦੇਸ਼ ਵਿਚ ਹੁਣ ਤੱਕ 1515 ਪੁਸ਼ਟੀ ਕੀਤੇ ਗਏ ਅਤੇ ਸੰਭਾਵੀ ਕੋਰੋਨਾ ਵਾਇਰਸ ਦੇ ਕੇਸ ਆਏ ਹਨ। 1483 ਠੀਕ ਹੋ ਗਏ ਹਨ। 22 ਦੀ ਮੌਤ ਹੋਈ ਹੈ। ਹਸਪਤਾਲ ਦੇ ਵਿੱਚ ਇਸ ਵੇਲੇ ਕੋਈ ਕੋਰੋਨਾ ਮਰੀਜ਼ ਨਹੀਂ ਹੈ।
