ਸਰੀ, 15 ਮਈ 2020 – ਕੈਨੇਡਾ ਦਾ ਬ੍ਰਿਟਿਸ਼ ਕੋਲੰਬੀਆ ਸੂਬਾ ਕੋਵਿਡ-19 ਦੇ ਮਾਰੂ ਪ੍ਰਭਾਵ ਨੂੰ ਰੋਕਣ ਲਈ ਤਾਂ ਬੇਹੱਦ ਸਫਲ ਰਿਹਾ ਹੈ ਪਰ ਦੁੱਖ ਦੀ ਗੱਲ ਇਹ ਹੈ ਕਿ ਇਨ੍ਹਾਂ ਦਿਨਾਂ ਦੌਰਾਨ ਵਾਪਰੀਆਂ ਨਸਲੀ ਵਿਤਕਰੇ ਦੀਆਂ ਘਟਨਾਵਾਂ ਨੇ ਇਸ ਬਹੁ-ਸੱਭਿਆਚਾਰਾਂ ਵਾਲੇ ਮੁਲਕ ਦੇ ਬਹੁ-ਗਿਣਤੀ ਵਸਨੀਕਾਂ ਬਹੁਤ ਪ੍ਰੇਸ਼ਾਨ ਕੀਤਾ ਹੋਇਆ ਹੈ। ਵੱਡਾ ਦੁਖਾਂਤ ਇਹ ਵੀ ਹੈ ਕਿ ਨਸਲੀ ਵਿਤਕਰੇ ਦੀ ਭੜਾਸ ਕੱਢਣ ਲਈ ਏਸ਼ੀਆਈ ਲੋਕਾਂ ਨੂੰ ਨਿਸ਼ਾਨਾਂ ਬਣਾਇਆ ਗਿਆ ਅਤੇ ਖਾਸ ਤੌਰ ‘ਤੇ ਚੀਨੀ ਭਾਈਚਾਰੇ ਨੂੰ ਜ਼ਲੀਲ ਕੀਤਾ ਗਿਆ।
ਪਿਛਲੇ ਦੋ ਕੁ ਮਹੀਨੇ ਦੇ ਸਮੇਂ ਵਿਚ ਅਜਿਹੀਆਂ ਪ੍ਰੇਸ਼ਾਨ ਕਰਨ ਵਾਲੀਆਂ ਘਟਨਾਵਾਂ ਦੀਆਂ ਕੁਝ ਤਾਜ਼ਾ ਮਿਸਾਲਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਵਿੱਚ ਇੱਕ 92 ਸਾਲਾ ਏਸ਼ੀਅਨ ਬਜ਼ੁਰਗ ਨੂੰ ਵੀ ਬਖਸ਼ਿਆ ਨਹੀਂ ਗਿਆ ਜਦੋਂ ਨੋਨੈਮੋ ਸਟ੍ਰੀਟ ਅਤੇ ਈਸਟ ਫਰਸਟ ਐਵੀਨਿਊ ਨੇੜੇ ਇੱਕ ਸਟੋਰ ਚੋਂ ਧੱਕੇ ਉਸ ਨੂੰ ਮਾਰ ਕੇ ਬਾਹਰ ਕੱਢਿਆ ਗਿਆ ਅਤੇ ਫਿਰ ਡਿੱਗੇ ਪਏ ਦੇ ਠੁੱਡੇ ਮਾਰੇ ਗਏ। ਵੈਨਕੂਵਰ ਵਿਚ ਹੀ ਇੱਕ ਹੋਰ ਘਟਨਾ ਵਿਚ ਟ੍ਰਾਂਸਲਿੰਕ ਬੱਸ ਵਿਚ ਸਵਾਰ ਇਕ ਏਸ਼ੀਅਨ ਔਰਤ ਉੱਤੇ ਹਮਲਾ ਕੀਤਾ ਗਿਆ ਅਤੇ ਉਸ ਦੇ ਸਿਰ ਵਿਚ ਥੁੱਕਿਆ ਗਿਆ।
ਇਸੇ ਤਰ੍ਹਾਂ ਬੱਸ ਵਿੱਚ ਸਵਾਰ ਦੋ ਏਸ਼ੀਅਨ ਔਰਤਾਂ, ਜਿਨ੍ਹਾਂ ਨੇ ਫੇਸ ਮਾਸਕ ਪਹਿਨੇ ਸਨ, ਉਪਰ ਇਕ ਨਸਲੀ ਜ਼ਹਿਨੀਅਤ ਵਾਲੇ ਬੰਦੇ ਨੇ ਉਨ੍ਹਾਂ ਨੂੰ ਕਥਿਤ ਤੌਰ ‘ਤੇ’ ਆਪਣੇ ਦੇਸ਼ ਵਾਪਸ ਜਾਣ ਦੀ ਟਿੱਪਣੀ ਕਰਦਿਆਂ ਕਿਹਾ ਕਿ ਇਹ ਸਭ ਕੁਝ ਥੋਡੇ ਕਰਕੇ ਹੀ ਹੋਇਆ ਹੈ। ਇਥੇ ਹੀ ਬੱਸ ਨਹੀਂ ਇਸ ਬੰਦੇ ਨੇ ਬਹਿਸ ਕਰਦਿਆਂ ਇਕ ਔਰਤ ਦੇ ਲੱਤ ਮਾਰੀ ਅਤੇ ਫਿਰ ਉਸ ਦੇ ਸਿਰ ਦੇ ਵਾਲ ਪੁੱਟ ਸੁੱਟੇ।
ਰਿਚਮੰਡ ਦੀ ਇਕ ਘਟਨਾ ਵਿਚ ਕਲਾਰਾ ਕਨ ਅਤੇ ਉਸਦੀ ਮਾਂ, ਗੈਰੀ ਪੁਆਇੰਟ ਨੇੜੇ ਸੈਰ ਕਰਨ ਲਈ ਬਾਹਰ ਨਿਕਲੀਆਂ ਸਨ ਕਿ ਕੋਲੋਂ ਦੀ ਕਾਰ ਵਿਚ ਲੰਘਦੇ ਦੋ ਗੋਰੇ ਵਿਅਕਤੀਆਂ ਦੁਆਰਾ ਬੋਲੇ ਸ਼ਬਦ ਉਨ੍ਹਾਂ ਨੂੰ ਹਾਲੇ ਵੀ ਸੂਲਾਂ ਵਾਂਗ ਚੁਭ ਰਹੇ ਹਨ “ ਤੁਸੀਂ ਇਸ ਤਰਾਂ ਦੇ ਹੋ? …ਜਾਓ ਆਪਣੇ ਦੇਸ਼ ਵਾਪਸ ਚਲੇ ਜਾਓ!”
ਵੈਨਕੂਵਰ ਪੁਲਿਸ ਵਿਭਾਗ ਅਨੁਸਾਰ ਇਸ ਸਾਲ ਦੇ ਪਹਿਲੇ ਚਾਰ ਮਹੀਨਿਆਂ ਦੌਰਾਨ ਪੁਲਿਸ ਨੇ ਏਸ਼ੀਆਈ ਲੋਕਾਂ ਵਿਚ ਨਫ਼ਰਤ ਕਰਨ ਸਬੰਧੀ 20 ਕੇਸ ਦਰਜ ਕੀਤੇ ਹਨ ਜਦੋਂ ਕਿ 2019 ਦੇ ਪੂਰੇ ਸਾਲ ਦੌਰਾਨ ਅਜਿਹੇ ਸਿਰਫ 12 ਨਸਲੀ ਜੁਰਮ ਹੀ ਦਰਜ ਕੀਤੇ ਗਏ ਸਨ।
ਬੀਸੀ ਦੀ ਸਿਟੀਜ਼ਨਜ਼ ਸਰਵਿਸਿਜ਼ ਅਤੇ ਸੱਭਿਆਚਾਰ ਮੰਤਰੀ ਅਨੇ ਕੰਗ ਨੇ ਇਸ ਸਬੰਧ ਵਿਚ ਕਿਹਾ ਹੈ ਕਿ ਕੋਵਿਡ-19 ਦੇ ਸ਼ੁਰੂ ਹੋਣ ਤੋਂ ਬਾਅਦ ਬੀਸੀ ਵਿਚ ਏਸ਼ੀਅਨ ਵਿਰਾਸਤ ਦੇ ਲੋਕਾਂ ਪ੍ਰਤੀ ਨਸਲੀ ਹਮਲਿਆਂ ਵਿੱਚ ਵਾਧਾ ਹੋਇਆ ਹੈ ਪਰ ਬੀਸੀ ਵਿਚ ਅਜਿਹੀਆਂ ਨਸਲੀ ਹਰਕਤਾਂ ਬਰਦਾਸ਼ਤ ਨਹੀਂ ਕੀਤੀਆਂ ਜਾਣਗੀਆਂ।
ਬੀਸੀ ਦੇ ਪ੍ਰੀਮੀਅਰ ਜੋਹਨ ਹੌਰਗਨ ਨੇ ਏਸ਼ੀਆਈ ਮੂਲ ਦੇ ਲੋਕਾਂ ਵਿਰੁੱਧ ਨਫ਼ਰਤੀ ਜੁਰਮ ਦੀਆਂ ਤਾਜ਼ਾ ਘਟਨਾਵਾਂ ਬਾਰੇ ਆਪਣੀ ਨਾ-ਖੁਸ਼ੀ ਅਤੇ ਫਿਕਰਮੰਦੀ ਜ਼ਾਹਰ ਕਰਦਿਆਂ ਬ੍ਰਿਟਿਸ਼ ਕੋਲੰਬੀਆ ਦੇ ਸਮੂਹ ਲੋਕਾਂ ਨੂੰ ਨਸਲਵਾਦ ਵਿਰੁੱਧ ਇਕੱਠੇ ਹੋਣ ਲਈ ਪ੍ਰੇਰਿਆ ਹੈ। ਉਨ੍ਹਾਂ ਇਕ ਬਿਆਨ ਵਿਚ ਕਿਹਾ ਹੈ ਕਿ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਨਫ਼ਰਤ ਲਈ ਕੋਈ ਸਥਾਨ ਨਹੀਂ। ਅਸੀਂ ਇਸ ਸਮੇਂ ਸੰਕਟ ਵਿੱਚੋਂ ਲੰਘ ਰਹੇ ਹਾਂ ਅਤੇ ਉਸ ਦਾ ਟਾਕਰਾ ਕਰਨ ਲਈ ਸਾਨੂੰ ਇਕ ਦੂਜੇ ਉਪਰ ਉਂਗਲੀ ਉਠਾਉਣ ਦੀ ਬਜਾਏ ਆਪਣੇ ਮਤਭੇਦਾਂ ਨੂੰ ਭੁਲਾ ਕੇ ਇਕਮੁੱਠ ਕੇ ਹੰਭਲਾ ਮਾਰਨਾ ਚਾਹੀਦਾ ਹੈ।
ਬੀਸੀ ਦੀ ਸਿਟੀਜ਼ਨਜ਼ ਸਰਵਿਸਿਜ਼ ਅਤੇ ਸੱਭਿਆਚਾਰ ਮੰਤਰੀ ਅਨੇ ਕੰਗ ਨੇ ਇਸ ਸਬੰਧ ਵਿਚ ਕਿਹਾ ਹੈ ਕਿ ਕੋਵਿਡ-19 ਦੇ ਸ਼ੁਰੂ ਹੋਣ ਤੋਂ ਬਾਅਦ ਬੀਸੀ ਵਿਚ ਏਸ਼ੀਅਨ ਵਿਰਾਸਤ ਦੇ ਲੋਕਾਂ ਪ੍ਰਤੀ ਨਸਲੀ ਹਮਲਿਆਂ ਵਿੱਚ ਵਾਧਾ ਹੋਇਆ ਹੈ ਪਰ ਬੀਸੀ ਵਿਚ ਅਜਿਹੀਆਂ ਨਸਲੀ ਹਰਕਤਾਂ ਬਰਦਾਸ਼ਤ ਨਹੀਂ ਕੀਤੀਆਂ ਜਾਣਗੀਆਂ।