ਅਮਰੀਕਾ ਵਿੱਚ ਕੋਰੋਨਾ ਪੀੜਤ ਜਰਮਨ ਸ਼ੈਫਰਡ ਕੁੱਤੇ ਦੀ ਮੌਤ

ਨਿਊਯਾਰਕ, 31 ਜੁਲਾਈ- ਅਮਰੀਕਾ ਵਿਚ ਕੋਰੋਨਾ ਵਾਇਰਸ ਨਾਲ ਪੀੜਤ ਜਰਮਨ ਸ਼ੈਫਰਡ ਕੁੱਤੇ ਦੀ ਮੌਤ ਹੋ ਗਈ ਹੈ| ਕਿਸੇ ਕੁੱਤੇ ਦੇ ਕੋਰੋਨਾ ਵਾਇਰਸ ਨਾਲ ਪੀੜਤ ਹੋਣ ਦਾ ਇਹ ਪਹਿਲਾ ਪੁਸ਼ਟ ਮਾਮਲਾ ਸੀ| ਸਟੇਟਨ ਆਈਲੈਂਡ ਦੇ ਰਾਬਰਟ ਅਤੇ ਐਲਿਸਨ ਮਾਹਨੀ ਨੇ ਰਾਸ਼ਟਰੀ ਜਿਓਗ੍ਰਾਫਕ ਨੂੰ ਦੱਸਿਆ ਕਿ ਉਨ੍ਹਾਂ ਦੇ 7 ਸਾਲ ਦੇ ਕੁੱਤੇ ‘ਬਡੀ’ ਨੂੰ ਸਾਹ ਲੈਣ ਵਿਚ ਪਰੇਸ਼ਾਨੀ ਹੋਣ ਲੱਗੀ ਸੀ ਅਤੇ ਉਹ ਕਈ ਹਫਤੇ ਤੱਕ ਵਾਇਰਸ ਦੀ ਲਪੇਟ ਵਿੱਚ ਰਿਹਾ|
ਜਾਨਵਰਾਂ ਦੇ ਡਾਕਟਰ ਨੇ ਕੁੱਤੇ ਦੀ ਜਾਂਚ ਕੀਤੀ,ਜਿਸ ਵਿਚ ਉਸ ਦੇ ਕੋਰੋਨਾ ਪੀੜਤ ਹੋਣ ਦੀ ਪੁਸ਼ਟੀ ਹੋਈ ਸੀ| ਅਮਰੀਕਾ ਦੇ ਖੇਤੀ ਵਿਭਾਗ ਨੇ ਜੂਨ ਵਿੱਚ ਜਾਣਕਾਰੀ ਦਿੱਤੀ ਸੀ ਕਿ ਨਿਊਯਾਰਕ ਵਿੱਚ ਇਕ ਜਰਮਨ ਸ਼ੈਫਰਡ ਕੁੱਤਾ ਕੋਰੋਨਾ ਪਾਜ਼ੀਟਿਵ ਪਾਇਆ ਗਿਆ ਹੈ, ਜੋ ਪਹਿਲਾ ਮਾਮਲਾ ਹੈ| ਬਡੀ ਦੀ ਹਾਲਤ ਹੋਰ ਖਰਾਬ ਹੋਣ ਨਾਲ ਉਸ ਨੂੰ ਦਰਦ ਰਹਿਤ ਮੌਤ ਦੇ ਦਿੱਤੀ ਗਈ| ਬਡੀ ਦੀ ਖੂਨ ਦੀ ਜਾਂਚ ਵਿੱਚ ਪ੍ਰਤੀਰੋਧੀ ਪ੍ਰਣਾਲੀ ਦੇ ਕੈਂਸਰ ਦਾ ਵੀ ਪਤਾ ਲੱਗਾ ਹੈ| ਖੇਤੀ ਵਿਭਾਗ ਨੇ ਅਮਰੀਕਾ ਵਿਚ ਕਈ ਜਾਨਵਰਾਂ ਵਿਚ ਕੋਰੋਨਾ ਵਾਇਰਸ ਦੀ ਪੁਸ਼ਟੀ ਕੀਤੀ ਹੈ| ਹੁਣ ਤੱਕ 12 ਕੁੱਤੇ, 10 ਬਿੱਲੀਆਂ, ਇਕ ਬਾਘ ਅਤੇ ਇਕ ਸ਼ੇਰ ਕੋਰੋਨਾ ਵਾਇਰਸ ਨਾਲ ਪੀੜਤ ਪਾਏ ਗਏ ਹਨ| ਵਿਭਾਗ ਨੇ ਕਿਹਾ ਕਿ ਪਸ਼ੂਆਂ ਤੋਂ ਕੋਰੋਨਾ ਵਾਇਰਸ ਫੈਲਣ ਦੇ ਸਬੂਤ ਨਹੀਂ ਮਿਲੇ ਪਰ ਅਜਿਹਾ ਲੱਗਦਾ ਹੈ ਕਿ ਕੁਝ ਸਥਿਤੀਆਂ ਵਿੱਚ ਲੋਕਾਂ ਤੋਂ ਇਹ ਵਾਇਰਸ ਜਾਨਵਰਾਂ ਵਿੱਚ ਫੈਲ ਸਕਦਾ ਹੈ|