ਪ੍ਰਧਾਨ ਮੰਤਰੀ ਮੋਦੀ ਨੇ ਮਣੀਪੁਰ ਪਾਣੀ ਸਪਲਾਈ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰੱਖਿਆ

ਨਵੀਂ ਦਿੱਲੀ, 23 ਜੁਲਾਈ – ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮਣੀਪੁਰ ਪਾਣੀ ਸਪਲਾਈ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰੱਖਿਆ| ‘ਹਰ ਘਰ ਜਲ’ ਮਿਸ਼ਨ ਨੂੰ ਪੂਰਾ ਕਰਨ ਵਿੱਚ ਇਹ ਪ੍ਰਾਜੈਕਟ ਅਹਿਮ ਯੋਗਦਾਨ ਪਾਵੇਗਾ| ਇਸ ਦਾ ਫਾਇਦਾ ਮਣੀਪੁਰ ਦੇ ਲੋਕਾਂ ਨੂੰ ਮਿਲੇਗਾ| ਪ੍ਰਧਾਨ ਮੰਤਰੀ ਮੋਦੀ ਨੇ ਵੀਡੀਓ ਕਾਨਫਰੰਸਿੰਗ ਜ਼ਰੀਏ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰੱਖਿਆ| ਇਸ ਪ੍ਰਾਜੈਕਟ ਤਹਿਤ ਮਣੀਪੁਰ ਦੇ 16 ਜ਼ਿਲ੍ਹਿਆਂ ਦੇ 2,80,756 ਪਰਿਵਾਰਾਂ ਦੇ ਘਰ ਤੱਕ ਪਾਣੀ ਪਹੁੰਚਾਉਣ ਦਾ ਟੀਚਾ ਹੈ| ਕੇਂਦਰ ਨੇ ਮਣੀਪੁਰ ਦੇ 1,42,749 ਘਰਾਂ ਦੇ ਨਾਲ ਹੀ 1,185 ਬਸਤੀਆਂ ਨੂੰ ਕਵਰ ਕਰਨ ਲਈ ਘਰੇਲੂ ਨਲ ਕਨੈਕਸ਼ਨ ਲਈ ਧਨ ਪ੍ਰਦਾਨ ਕੀਤਾ ਹੈ|
ਮਣੀਪੁਰ ਪਾਣੀ ਸਪਲਾਈ ਪ੍ਰਾਜੈਕਟ 2024 ਤੱਕ ਹਰੇਕ ਪੇਂਡੂ ਪਰਿਵਾਰ ਨੂੰ ਸੁਰੱਖਿਅਤ ਅਤੇ ਕਾਫ਼ੀ ਮਾਤਰਾ ਵਿਚ ਪੀਣ ਵਾਲਾ ਪਾਣੀ ਉਪਲੱਬਧ ਕਰਾਉਣ ਲਈ ਕੇਂਦਰ ਦੇ ਜਲ ਜੀਵਨ ਮਿਸ਼ਨ ਦਾ ਹਿੱਸਾ ਹੈ| ਸੂਬਾ ਸਰਕਾਰ ਨੇ ਧਨ ਦੇ ਵਾਧੂ ਸਰੋਤਾਂ ਦੇ ਜ਼ਰੀਏ ਬਾਕੀ ਘਰਾਂ ਨੂੰ ਕਵਰ ਕਰਨ ਦੀ ਯੋਜਨਾ ਬਣਾਈ ਹੈ, ਜਿਸ ਵਿੱਚ ਪੂਰਬ-ਉੱਤਰ ਖੇਤਰ ਵਿਕਾਸ ਮਹਿਕਮੇ ਤੋਂ ਫੰਡ ਸ਼ਾਮਲ ਹੈ| ਪ੍ਰਾਜੈਕਟ ਦਾ ਖਰਚ ਨਿਊ ਡਿਵੈਲਪਮੈਂਟ ਬੈਂਕ ਵਲੋਂ ਵਿੱਤੀ ਕਰਜ਼ ਦੇ ਨਾਲ ਲੱਗਭਗ 3,054.58 ਕਰੋੜ ਰੁਪਏ ਹੈ| ਓਧਰ ਆਪਣੇ ਸੰਬੋਧਨ ਵਿੱਚ ਸੂਬੇ ਦੇ ਮੁੱਖ ਮੰਤਰੀ ਬੀਰੇਨ ਸਿੰਘ ਨੇ ਕਿਹਾ ਕਿ ਸੂਬਾ ਸਰਕਾਰ ਦੀ ਸਿਰਫ ਇਕ ਚਿੱਠੀ ਤੇ ਹੀ ਪੀ. ਐਮ. ਓ. ਨੇ ਇਸ ਪ੍ਰਾਜੈਕਟ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ| ਕੇਂਦਰ ਵਲੋਂ ਸੂਬੇ ਨੂੰ ਲਗਾਤਾਰ ਮਦਦ ਮਿਲ ਰਹੀ ਹੈ|