ਫਿਰੋਜ਼ਪੁਰ 17 ਜੁਲਾਈ 2020 – ਕੋਰੋਨਾ ਵਰਗੀ ਮਹਾਂਮਾਰੀ ਨਾਲ ਲੜਨ ਵਾਸਤੇ ਵੀਹ ਮਾਰਚ ਤੋਂ ਪੰਜਾਬ ‘ਚ ਲਾਗੂ ਕੀਤੇ ਕਰਫਿਊ ਤੋਂ ਲੈ ਕੇ ਹੁਣ ਤੱਕ ਬੰਦ ਪਏ ਵੱਖ ਵੱਖ ਹਜ਼ਾਰਾਂ ਕੋਚਿੰਗ ਤੇ ਕੰਪਿਊਟਰ ਸੈਂਟਰਾਂ ਨਾਲ ਜੁੜੇ ਲਗਭਗ ਦਸ ਲੱਖ ਦੇ ਕਰੀਬ ਪਰਿਵਾਰ ਬੇਰੁਜ਼ਗਾਰ ਹੋ ਗਏ ਹਨ ਅਤੇ ਇਹਨਾਂ ਸੈਟਰਾਂ ‘ਚੋਂ ਸਿੱਖਿਆਂ ਪ੍ਰਾਪਤ ਕਰ ਕੇ ਆਪਣਾ ਭਵਿੱਖ ਸੰਵਾਰਨ ਵਾਲੇ ਲੱਖਾਂ ਵਿਦਿਆਰਥੀਆਂ ਦੀ ਜ਼ਿੰਦਗੀ ਵੀ ਹਨੇਰੇ ਵਿੱਚ ਚਲੀ ਗਈ ਹੈ, ਜਦ ਕਿ ਸਰਕਾਰ ਆਪਣੇ ਕਾਰੋਬਾਰ ਚਲਾਉਣ ਲਈ ਹਰ ਨਿਯਮ ਨੂੰ ਛਿੱਕੇ ਟੰਗ ਕੇ ਕੰਮ ਚਲਾ ਰਹੀ ਹੈ ਇਹਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਚਰਨਜੀਤ ਸਿੰਘ ਬਰਾੜ ਬੁਲਾਰੇ ਸ਼੍ਰੋਮਣੀ ਅਕਾਲੀ ਦਲ ਅਤੇ ਸਿਆਸੀ ਸਕੱਤਰ ਸੁਖਬੀਰ ਸਿੰਘ ਬਾਦਲ ਨੇ ਜਾਰੀ ਇੱਕ ਬਿਆਨ ‘ਚ ਕੀਤਾ ।
ਉਹਨਾਂ ਕਿਹਾ ਕਿ ਸਰਕਾਰ ਦੀ ਗਲਤ ਨੀਤੀ ਕਾਰਨ ਆਈਲੈਟਸ, ਕੰਪਿਊਟਰ, ਸਕਿੱਲ ਡਿਵੈਲਪਮੈਂਟ, ਸਮੇਤ ਵੱਡੀ ਗਿਣਤੀ ਵਿੱਚ ਸਿੱਖਿਆ , ਰੁਜ਼ਗਾਰ ਅਤੇ ਵਿਦੇਸ਼ੀ ਸਿੱਖਿਆ ਪ੍ਰਾਪਤ ਕਰਨ ਵਾਲੇ ਲੱਖਾਂ ਵਿਦਿਆਰਥੀਆਂ ਨੂੰ ਤਿਆਰੀ ਕਰਵਾਈ ਜਾਦੀ ਸੀ ,ਅੱਜ ਇਹਨਾਂ ਸੈਟਰਾਂ ਨੂੰ ਪੰਜਾਬ ‘ਚ ਚਲਾਉਣ ਵਾਲੇ ਹਜਾਰਾਂ ਪਰਿਵਾਰ ਅਤੇ ਉਹਨਾਂ ਨਾਲ ਜੁੜੇ ਲੱਖਾਂ ਅਧਿਆਪਕ ਤੇ ਕਰਮਚਾਰੀ ਦੋ ਟੁੱਕ ਦੀ ਰੋਟੀ ਤੋ ਵੀ ਮੁਥਾਜ ਹੋ ਗਏ ਹਨ ਜਦ ਕਿ ਸਰਕਾਰ ਵੱਲੋਂ ਇਹਨਾਂ ਦੇ ਇਸ ਰੋਜਗਾਰ ਨੂੰ ਬਚਾਉਣ ਲਈ ਕੋਈ ਵੀ ਠੋਸ ਨੀਤੀ ਵੱਲ ਧਿਆਨ ਨਹੀਂ ਦਿੱਤਾ ਗਿਆ ।
ਬਰਾੜ ਨੇ ਕਿਹਾ ਕਿ ਇੱਕ ਚਾਲੀ ਫੁੱਟ ਲੰਮੀ ਬੱਸ ‘ਚ 50 ਸਵਾਰੀਆਂ ਬੈਠ ਕੇ ਸਫਰ ਕਰ ਸਕਦੀਆਂ ਹਨ ਜਾਂ ਸ਼ਰਾਬ ਦੇ ਠੇਕਿਆਂ ਤੇ ਗਿਣਤੀ ਦੀ ਕੋਈ ਮਾਤਰਾ ਨਹੀ ਤਾਂ ਇਕ ਖੁੱਲੇ ਹਾਲ ‘ਚ ਇਹਨਾਂ ਸੈਟਰਾਂ ‘ਚ ਸਿੱਖਿਆ ਪ੍ਰਾਪਤ ਕਰਨ ਵਾਲਿਆਂ ਨੂੰ ਵਾਰੀ ਸਿਰ ਖੁੱਲੇ-ਖੁੱਲੇ ਬੈਠ ਕੇ ਮਾਸਕ ਪਾ ਕੇ ਅਤੇ ਸੈਨੀਟਾਈਜ ਦੀ ਵਰਤੋ ਸਮੇਤ ਹਦਾਇਤਾਂ ਦੀ ਪਾਲਣਾ ਕਰਨ ਦੇ ਆਦੇਸ਼ਾਂ ਅਨੁਸਾਰ ਸੈਂਟਰ ਖੋਲਣ ਦੀ ਮਨਜੂਰੀ ਦਿਤੀ ਜਾਵੇ ਤਾਂ ਜੋ ਪ੍ਰਭਾਵਿਤ ਹੋ ਰਹੇ ਲੱਖਾਂ ਪਰਿਵਾਰ ਦੇ ਰੋਜਗਾਰ ਨੂੰ ਬਚਾਇਆ ਜਾ ਸਕੇ । ਉਹਨਾਂ ਕਿਹਾ ਕਿ ਸਰਕਾਰ ਵੱਲੋਂ ਕੋਈ ਠੋਸ ਨੀਤੀ ਨਾ ਬਣਾਉਣ ਕਰ ਕੇ ਵੱਖ ਵੱਖ ਪ੍ਰਾਈਵੇਟ ਸਕੂਲਾਂ ਦੇ ਪ੍ਰਬੰਧਕ ਅਤੇ ਬੱਚਿਆ ਦੇ ਮਾਪੇ ਆਹਮਣੇ ਸਾਹਮਣੇ ਮਾਨਯੋਗ ਅਦਾਲਤਾਂ ਦੇ ਚੱਕਰ ਕੱਟ ਰਹੇ ਹਨ, ਜਦ ਕਿ ਇਸ ਲਈ ਨਿਯਮ ਬਣਾਉਣਾ ਸੂਬਾ ਸਰਕਾਰ ਦੀ ਮੁੱਢਲੀ ਜਿੰਮੇਵਾਰੀ ਮਾਨਯੋਗ ਅਦਾਲਤ ਵੱਲੋ ਲਾਈ ਗਈ ਸੀ ਤੇ ਸਰਕਾਰ ਆਪਣੇ ਵੱਲੋ ਮੱਦਦ ਕਰਕੇ ਦੋਨਾਂ ਧਿਰਾਂ ਨੂੰ ਰਲੀਫ ਦੇ ਸਕਦੀ ਸੀ ਜੋ ਨਹੀ ਦਿੱਤਾ ਗਿਆ।
