ਜੀਂਦ, 8 ਜੁਲਾਈ- ਭਿਵਾਨੀ ਮਾਰਗ ਤੇ ਪਿੰਡ ਬੀਬੀਪੁਰ ਦੇ ਕੋਲ ਭਿਵਾਨੀ ਰੋਡਵੇਜ ਦੀ ਇੱਕ ਬਸ ਅਤੇ ਕਰੂਜਰ ਜੀਪ ਦੇ ਵਿਚਾਲੇ ਆਹਮੋ – ਸਾਹਮਣੇ ਟੱਕਰ ਹੋ ਗਈ। ਇਸ ਖਤਰਨਾਕ ਹਾਦਸੇ ਵਿੱਚ ਅੱਠ ਵਿਅਕਤੀਆਂ ਦੀ ਮੌਤ ਹੋ ਗਈ ਹੈ ਜਦੋਂ ਕਿ 12 ਹੋਰ ਗੰਭੀਰ ਰੂਪ ਨਾਲ ਜਖ਼ਮੀ ਹੋ ਗਏ ਹਨ। ਹਾਦਸਾ ਸਵੇਰੇ ਦਸ ਵਜੇ ਹੋਇਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਭਿਵਾਨੀ ਡਿਪੋ ਦੀ ਇੱਕ ਬਸ ਸਵੇਰੇ ਸਾਢੇ ਨੌਂ ਵਜੇ ਜੀਂਦ ਬਸ ਸਟੈਂਡ ਤੋਂ ਨਿਕਲੀ ਸੀ। ਜਦੋਂ ਉਹ ਬੀਬੀਪੁਰ ਪਿੰਡ ਦੇ ਕੋਲ ਪਹੁੰਚੀ ਤਾਂ ਮੁੰਢਾਲ ਤੋਂ ਸਵਾਰੀ ਭਰਕੇ ਚੱਲੀ ਇੱਕ ਕਰੂਜਰ ਜੀਪ ਨਾਲ ਉਸਦੀ ਆਹਮੋ ਸਾਹਮਣੇ ਟੱਕਰ ਹੋ ਗਈ। ਟੱਕਰ ਇੰਨੀ ਭਿਆਨਕ ਸੀ ਕਿ ਇਸ ਹਾਦਸੇ ਵਿੱਚ ਕਰੂਜਰ ਜੀਪ ਦੇ ਪਰਖੱਚੇ ਉੱਡ ਗਏ। ਮੌਕੇ ਤੇ ਹੀ ਚਾਰ ਵਿਅਕਤੀਆਂ ਦੀ ਮੌਤ ਹੋ ਗਈ। ਆਸਪਾਸ ਦੇ ਲੋਕਾਂ ਨੇ ਸਾਰੇ ਜਖ਼ਮੀਆਂ ਨੂੰ ਨਾਗਰਿਕ ਹਸਪਤਾਲ ਵਿੱਚ ਪਹੁੰਚਾਇਆ ਜਿੱਥੇ ਚਾਰ ਹੋਰ ਵਿਅਕਤੀਆਂ ਦੀ ਮੌਤ ਹੋ ਗਈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਸ ਹਾਦਸੇ ਵਿੱਚ ਤਿੰਨ ਔਰਤਾਂ, ਇੱਕ ਬੱਚੇ ਅਤੇ ਛੇ ਹੋਰ ਵਿਅਕਤੀਆਂ ਸਮੇਤ 12 ਵਿਅਕਤੀ ਗੰਭੀਰ ਰੂਪ ਨਾਲ ਜਖ਼ਮੀ ਹੋਏ ਹਨ। ਸਾਰਿਆਂ ਦਾ ਇਲਾਜ ਸਿਵਲ ਹਸਪਤਾਲ ਵਿੱਚ ਚੱਲ ਰਿਹਾ ਹੈ।
