ਸਰੀ, 16 ਜੂਨ 2020 – ਵੈਨਕੂਵਰ ਪੁਲਿਸ ਅਧਿਕਾਰੀਆਂ ਨੇ ਅੱਜ ਡਾਊਨ ਟਾਊਨ ਈਸਟਸਾਈਡ ਵਿਚ ਇਕ ਕਮਰੇ ਵਿੱਚੋਂ ਕਈ ਰਿਪਲੀਕਾ ਰਾਈਫਲਾਂ, ਟੈਕਟੀਕਲ ਵੈਸਟ ਅਤੇ ਹਥਿਆਰ ਜ਼ਬਤ ਕੀਤੇ ਹਨ।
ਸਰਜੈਂਟ ਆਰੋਨ ਰੋਡ ਨੇ ਦੱਸਿਆ ਹੈ ਕਿ ਜ਼ਬਤ ਕੀਤੀਆਂ ਰਾਈਫਲਾਂ ਦੀ ਕੁਆਲਟੀ ਅਤੇ ਇਨ੍ਹਾਂ ਦੀ ਤਕਨੀਕ ਫੌਜੀ ਗ੍ਰੇਡ ਦੀ ਹੋਣ ਕਰਕੇ ਇਹ ਬਰਾਮਦਗੀ ਕਾਫੀ ਅਹਿਮ ਹੈ। ਜ਼ਬਤ ਕੀਤੀਆਂ ਰਾਈਫਲਾਂ ਅਸਲੀ ਵਾਂਗ ਲਗਦੀਆਂ ਹਨ ਅਤੇ ਸ਼ਹਿਰ ਵਿਚ ਅਕਸਰ ਜੁਰਮ ਕਰਨ ਲਈ ਵਰਤੀਆਂ ਜਾਂਦੀਆਂ ਹਨ। ਸ਼ੱਕੀ ਮੁਜਰਮਾਂ ਨੂੰ ਪੁਲਿਸ ਜਾਣਦੀ ਹੈ ਅਤੇ ਉਨ੍ਹਾਂ ਦਾ ਪਿਛੋਕੜ ਵੀ ਅਪਰਾਧਿਕ ਹੈ।
ਪ੍ਰਾਪਤ ਸੂਚਨਾ ਅਨੁਸਾਰ ਪੁਲਿਸ ਅਧਿਕਾਰੀਆਂ ਨੇ ਅੱਜ ਸਵੇਰੇ ਮੇਨ ਅਤੇ ਈਸਟ ਹੇਸਟਿੰਗਜ਼ ਸਟਰੀਟ ਦੇ ਖੇਤਰ ਵਿੱਚ ਟੈਕਨੀਕਲ ਵੈਸਟਾਂ ਨਾਲ ਮਿਲਟਰੀ ਵਰਦੀ ਵਿੱਚ ਸਜੇ ਦੋ ਬੰਦਿਆਂ ਨੂੰ ਵੇਖਿਆ ਅਤੇ ਇਸ ਤੋਂ ਬਾਅਦ ਦੀ ਜਾਂਚ ਦੌਰਾਨ ਪੁਲਿਸ ਅਧਿਕਾਰੀ ਉਸ ਕਮਰੇ ਤੱਕ ਪਹੁੰਚੇ ਜਿੱਥੇ ਇਹ ਸਭ ਵਰਦੀਆਂ, ਹਥਿਆਰ ਪਏ ਸਨ।
