ਨਿਊਜ਼ੀਲੈਂਡ ‘ਚੋਂ ਕੋਰੋਨਾ ਖਤਮ ਹੋਣ ਨਾਲ ਹੀ ਡਾਲਰ ਦਾ ਰੇਟ ਵਧਿਆ

ਔਕਲੈਂਡ, 11 ਜੂਨ 2020 – ਅੱਜ ਜਿਵੇਂ ਹੀ ਦੇਸ਼ ਦੇ ਵਿਚ ਕੋਰੋਨਾ ਜ਼ੀਰੋ ਦਾ ਐਲਾਨ ਹੋਇਆ, ਉਸੇ ਵੇਲੇ ਬਿਜਨਸ ਕਰਦੇ ਅਦਾਰਿਆਂ ਦੇ ਮਾਲਕਾਂ ਅਤੇ ਉਨ੍ਹਾਂ ਦੇ ਕਾਮਿਆਂ ਦੇ ਚਿਹਰੇ ਖਿਲ ਗਏ। ਅੱਜ 9 ਜੂਨ ਤੋਂ ਦੇਸ਼ ਨਵੀਂ ਅੰਗੜਾਈ ਨਾਲ ਉੱਠਿਆ ਹੈ ਅਤੇ ਠੰਡੇ-ਠੰਡੇ ਮੌਸਮ ਦੇ ਵਿਚ ਆਰਥਿਕਤਾ ਦਾ ਚੁੱਲ੍ਹਾ ਗਰਮ ਕਰਕੇ ਦੁਬਾਰਾ ਦੇਸ਼ ਨੂੰ ਵਿਕਾਸ ਦੀ ਪਰਪੱਕਤਾ ਵਿਚ ਢਾਲ ਦੇਵੇਗਾ।
ਸਟਾਕ ਮਾਰਕੀਟ ਦੇ ਵਿੱਚ ਉਭਾਰ ਆ ਚੁੱਕਾ ਹੈ। ਲੈਵਲ ਦੋ ਦੇ ਵਿਚ ਡਾਲਰ ਦੀ ਕੀਮਤ ਨੇ ਕਾਫੀ ਉਚਾ ਜਾਣਾ ਸ਼ੁਰੂ ਕੀਤਾ ਅਤੇ 8 ਜੂਨ ਨੂੰ ਪ੍ਰਤੀ ਡਾਲਰ ਭਾਰਤੀ ਰੁਪਿਆ ਵਿਚ ਕੀਮਤ 49 ਰੁਪਏ 31 ਪੈਸੇ ਤੱਕ ਵੇਖੀ ਗਈ। ਸੋ ਅਜਿਹੇ ਝਲਕਾਰੇ ਆਉਣ ਵਾਲੇ ਚੰਗੇ ਸਮੇਂ ਦੇ ਸ਼ੁੱਭ ਸੰਕੇਤ ਹਨ। ਸੋ ਡਾਲਰਾਂ ਦਾ ਮੁੱਲ ਪੈਣ ਲੱਗ ਪਿਆ ਹੈ…ਪੈਸੇ ਭੇਜਣ ਦਾ ਵਧੀਆ ਮੌਕਾ ਹੈ ਜੇਕਰ ਕਰੋਨਾ ਦੇ ਡੰਗ ਤੋਂ ਬਚੇ ਰਹਿ ਗਏ ਹਨ।