ਸਰੀ, 10 ਜੂਨ 2020 – ਸਰੀ ਆਰਸੀਐਮਪੀ ਨੇ ਸਰੀ ਦੇ ਗਿਲਫਰਡ ਏਰੀਏ ਵਿਚ ਗੈਸ ਸਟੇਸ਼ਨ ਤੇ ਖੜ੍ਹੀ ਇਕ ਕਾਰ ਵਿੱਚੋਂ ਸ਼ੱਕੀ ਕੋਕੀਨ, ਹੈਰੋਇਨ, ਨਸ਼ੀਲੀਆਂ ਗੋਲੀਆਂ, 20 ਹਜਾਰ ਡਾਲਰ ਅਤੇ ਕੁਝ ਹਥਿਆਰ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਹੈ।
ਸਰੀ ਆਰਸੀਐਮਪੀ ਦੀ ਕਾਰਪੋਰੇਲ ਜੋਨੀ ਸਿੱਧੂ ਨੇ ਦੱਸਿਆ ਕਿ ਗਸ਼ਤ ਕਰ ਰਹੇ ਇਕ ਅਧਿਕਾਰੀ ਨੇ 168 ਸਟਰੀਟ ਅਤੇ 96 ਐਵੀਨਿਊ ਨੇੜੇ ਗੈਸ ਸਟੇਸ਼ਨ ਦੀ ਪਾਰਕਿੰਗ ਵਿਚ ਖੜ੍ਹੀ ਇਕ ਸ਼ੱਕੀ ਕਾਰ ਨੂੰ ਵੇਖਿਆ ਅਤੇ ਜਦੋਂ ਉਸ ਕਾਰ ਦੀ ਜਾਂਚ ਪੜਤਾਲ ਕੀਤੀ ਗਈ ਤਾਂ ਉਸ ਵਿੱਚੋਂ ਉਕਤ ਨਸ਼ੀਲੇ ਪਦਾਰਥ, ਨਕਦੀ ਅਤੇ ਕੁੱਝ ਹਥਿਆਰ ਮਿਲੇ।
ਇਸ ਸਬੰਧ ਵਿਚ ਇਕ ਆਦਮੀ ਅਤੇ ਔਰਤ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਪਰ ਜਾਂਚ ਜਾਰੀ ਹੋਣ ਕਾਰਨ ਦੋਸ਼ ਤੈਅ ਨਹੀਂ ਕੀਤੇ ਗਏ ਹਨ। ਜੋਨੀ ਸਿੱਧੂ ਨੇ ਕਿਹਾ ਕਿ ਨਸ਼ੀਲੇ ਪਦਾਰਥਾਂ ਦੀ ਇਹ ਬਰਾਮਦਗੀ ਸਾਡੇ ਫਰੰਟ ਲਾਈਨ ਅਧਿਕਾਰੀਆਂ ਵੱਲੋਂ ਦਿਖਾਈ ਸਰਗਰਮ ਪੁਲਿਸਿੰਗ ਦੀ ਇਕ ਵੱਡੀ ਮਿਸਾਲ ਹੈ।
