ਦਿੱਲੀ ਸਮੇਤ 9 ਸ਼ਹਿਰਾਂ ਵਿੱਚ ਮੈਟਰੋ ਸੇਵਾ ਸ਼ਰੂ

ਨਵੀਂ ਦਿੱਲੀ, 7 ਸਤੰਬਰ – ਕੋਰੋਨਾ ਵਾਇਰਸ ਦੀ ਆਫਤ ਕਾਰਨ ਦੇਸ਼ ਵਿੱਚ ਪਿਛਲੇ ਕਰੀਬ 6 ਮਹੀਨੇ ਤੋਂ ਬੰਦ ਮੈਟਰੋ ਸੇਵਾ ਮੁੜ ਸ਼ੁਰੂ ਹੋਈ| ਦਿੱਲੀ ਮੈਟਰੋ ਸੇਵਾ ਤੋਂ ਇਲਾਵਾ ਨੋਇਡਾ, ਚੇਨਈ, ਬੈਂਗਲੁਰੂ, ਕੋਚੀ, ਹੈਦਰਾਬਾਦ, ਜੈਪੁਰ, ਲਖਨਊ ਅਤੇ ਅਹਿਮਦਾਬਾਦ ਦੇ ਲੋਕ ਵੀ ਹੁਣ ਮੈਟਰੋ ਦੀ ਸਵਾਰੀ ਕਰ ਸਕਣਗੇ| ਉੱਥੇ ਹੀ ਕੋਲਕਾਤਾ ਵਿੱਚ ਕੱਲ ਤੋਂ ਸੇਵਾ ਸ਼ੁਰੂ ਹੋਵੇਗੀ| ਕੋਰੋਨਾ ਦੀ ਵਜ੍ਹਾ ਕਾਰਨ 25 ਮਾਰਚ 2020 ਤੋਂ ਪੂਰੇ ਦੇਸ਼ ਵਿੱਚ ਮੈਟਰੋ ਸੇਵਾ ਬੰਦ ਕਰ ਦਿੱਤੀ ਗਈ ਸੀ| ਦਿੱਲੀ ਵਿਚ ਕਰੀਬ 169 ਦਿਨਾਂ ਬਾਅਦ ਮੈਟਰੋ ਸੇਵਾ ਸ਼ੁਰੂ ਹੋਈ ਹੈ| ਪਹਿਲੇ ਪੜਾਅ ਵਿੱਚ ਸਵੇਰੇ 7 ਵਜੇ ਦਿੱਲੀ ਮੈਟਰੋ ਦੀਆਂ ਸੇਵਾਵਾਂ ਰੈਪਿਡ ਮੈਟਰੋ, ਗੁਰੂਗ੍ਰਾਮ ਸਮੇਤ ਯੈਲੋ ਲਾਈਨ ਤੇ ਸਮੇਂਪੁਰ ਬਾਦਲੀ ਤੋਂ ਹੁੱਡਾ ਸਿਟੀ ਸੈਂਟਰ ਵਿਚਾਲੇ ਬਹਾਲ ਕਰ ਦਿੱਤੀ ਗਈ| ਅਨਲੌਕ-4 ਵਿਚ ਕੇਂਦਰ ਸਰਕਾਰ ਨੇ 7 ਸਤੰਬਰ ਤੋਂ ਮੈਟਰੋ ਸੇਵਾ ਸ਼ੂਰ ਕਰਨ ਦਾ ਐਲਾਨ ਕੀਤਾ ਸੀ|
ਜਿਕਰਯੋਗ ਹੈ ਕਿ ਮੈਟਰੋ ਵਿੱਚ ਸਫਰ ਦੌਰਾਨ ਯਾਤਰੀਆਂ ਨੂੰ ਮਾਸਕ ਪਹਿਨਣ ਵਰਗੀਆਂ ਕਈ ਸ਼ਰਤਾਂ ਮੰਨਣੀਆਂ ਪੈਣਗੀਆਂ| ਇਸ ਦੇ ਨਾਲ-ਨਾਲ ਸਮਾਜਿਕ ਦੂਰੀ ਦਾ ਪਾਲਣ ਕਰਨਾ ਬੇਹੱਦ ਜ਼ਰੂਰੀ ਹੈ| ਯਾਤਰੀ ਸਿਰਫ ਸਮਾਰਟ ਕਾਰਡ ਤੋਂ ਹੀ ਯਾਤਰਾ ਕਰ ਸਕਦੇ ਹਨ| ਨਕਦੀ ਰਹਿਤ ਲੈਣ-ਦੇਣ ਹੋਵੇਗਾ| ਇਸ ਲਈ ਆਨਲਾਈਨ ਟਰਾਂਸਜੈਕਸ਼ਨ ਦੀ ਆਗਿਆ ਹੋਵੇਗੀ| ਕੰਟੇਨਮੈਂਟ ਜ਼ੋਨ ਵਿਚ ਆਉਣ ਵਾਲੇ ਮੈਟਰੋ ਸਟੇਸ਼ਨ ਬੰਦ ਹੀ ਰਹਿਣਗੇ| ਯਾਨੀ ਕਿ ਜਿੱਥੇ ਕੋਰੋਨਾ ਵਾਇਰਸ ਦਾ ਕਹਿਰ ਵਧੇਰੇ ਹੈ|
ਓਧਰ ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ (ਡੀ. ਐਮ. ਆਰ. ਸੀ.) ਮੁਤਾਬਕ ਸਟੇਸ਼ਨ ਅੰਦਰ ਸਾਫ਼-ਸਫਾਈ ਦਾ ਪੂਰਾ ਧਿਆਨ ਰੱਖਿਆ ਗਿਆ ਹੈ| ਮੈਟਰੋ ਸਟੇਸ਼ਨਾਂ ਵਿੱਚ ਕਿਸੇ ਨੂੰ ਵੀ ਬਿਨਾਂ ਮਾਸਕ ਦੇ ਐਂਟਰੀ ਨਹੀਂ ਦਿੱਤੀ ਜਾਵੇਗੀ| ਜੇਕਰ ਕੋਈ ਮਾਸਕ ਲਿਆਉਣਾ ਭੁੱਲ ਗਿਆ ਹੈ ਤਾਂ ਸਟੇਸ਼ਨ ਤੇ ਪੈਸੇ ਦੇ ਕੇ ਮਾਸਕ ਖਰੀਦ ਸਕਦਾ ਹੈ| ਇਸ ਤੋਂ ਇਲਾਵਾ ਜੇਕਰ ਕੋਈ ਬੀਮਾਰ ਜਾਂ ਜਿਸ ਵਿੱਚ ਵਾਇਰਸ ਦੇ ਹਲਕੇ ਲੱਛਣ ਹਨ ਤਾਂ ਉਸ ਨੂੰ ਵੀ ਐਂਟਰੀ ਨਹੀਂ ਮਿਲੇਗੀ|