ਫਿਰੋਜ਼ਪੁਰ, 9 ਜੁਲਾਈ, 2020 : : ਬਾਲੀਵੁੱਡ ਨੂੰ ਇਹਨਾਂ ਦਿਨਾਂ ਵਿਚ ਲਗਾਤਾਰ ਝਟਕੇ ਲੱਗ ਰਹੇ ਹਨ। ਪਿਛਲੇ ਕੁਝ ਮਹੀਨਿਆਂ ਤੋਂ ਕਈ ਦਿਗਜ਼ ਸਿਤਾਰਿਆਂ ਦੀਆਂ ਮੌਤਾਂ ਨਾਲ ਪੂਰਾ ਬਾਲੀਵੁੱਡ ਸਦਮੇਂ ਵਿੱਚ ਹੈ। ਬਾਲੀਵੁੱਡ ਅਦਾਕਾਰ ਜਗਦੀਪ ਦਾ ਬੁੱਧਵਾਰ ਨੂੰ ਰਾਤ ਘਰ ਵਿਚ ਹੀ ਦਿਹਾਂਤ ਹੋ ਜਾਣ ਦਾ ਬੁਰਾ ਸਮਾਚਾਰ ਹੈ। 81 ਸਾਲਾ ਜਗਦੀਪ ਪਿਛਲੇ ਕਾਫ਼ੀ ਸਮੇਂ ਤੋੰ ਸਰੀਰਿਕ ਪੱਖੋਂ ਕਮਜ਼ੋਰ ਹੋ ਗਏ ਸਨ। ਜਿਸ ਕਾਰਨ ਉਹਨਾਂ ਦੇ ਸਰੀਰ ਵਿਚ ਕਈ ਤਰ੍ਹਾਂ ਦੀਆਂ ਦਿੱਕਤਾਂ ਆ ਰਹੀਆਂ ਸਨ। ਬੀਤੀ ਰਾਤ ਉਹਨਾਂ ਨੇ ਪ੍ਰਾਣ ਤਿਆਗ ਦਿੱਤੇ। ਜਗਦੀਪ ਆਪਣੇ ਵੱਖਰੇ ਅੰਦਾਜ਼ ਕਾਰਨ ਮਸਹੂਰ ਸਨ। ਪੁਰਾਣੀਆਂ ਫ਼ਿਲਮਾਂ ਵੱਲ ਝਾਤ ਮਾਰੀਏ ਤਾਂ ਹਰ ਤੀਜੀ – ਚੌਥੀ ਫਿਲਮ ਦਾ ਉਹ ਸ਼ਿੰਗਾਰ ਹੋਇਆ ਕਰਦੇ ਸਨ। ਬਲਾਕਬਸਟਰ ਫਿਲਮ ਸ਼ੋਅਲੇ ‘ਚ ਸੂਰਮਾ ਭੋਪਾਲੀ ਦੀ ਭੂਮਿਕਾ ਨਿਭਾਉਣ ਕਰਕੇ ਉਹਨਾਂ ਨੂੰ ਹਮੇਸ਼ਾਂ ਯਾਦ ਕੀਤਾ ਜਾਂਦਾ ਰਿਹਾ ਹੈ।
ਜਗਦੀਪ ਦੇ ਬੇਟੇ ਜਾਵੇਦ ਜ਼ਾਫਰੀ ਨੇ ਵੀ ਬਾਲੀਵੁੱਡ ਵਿੱਚ ਬਹੁਤ ਨਾਮਣਾ ਖੱਟਿਆ ਹੈ। ਜਗਦੀਪ ਦੀ ਮੌਤ ‘ਤੇ ਸਮੁੱਚਾ ਬਾਲੀਵੁੱਡ ਸਦਮੇਂ ਵਿੱਚ ਹੈ ਅਤੇ ਕਈ ਦਿਗਜ਼ ਸਿਤਾਰਿਆਂ ਨੇ ਉਹਨਾਂ ਦੀ ਮੌਤ ਤੇ ਦੁੱਖ ਜਿਤਾਇਆ ਹੈ।
