ਵਿਰੋਧੀਆਂ ਦੀਆਂ ਟਿੱਪਣੀਆਂ ਮਗਰੋਂ ਟਰੂਡੋ ਨੇ ਵਿਸ਼ਵ ਆਗੂਆਂ ਨਾਲ ਸਾਂਝੀ ਕੀਤੀ ਆਪਣੀ ਵੀਡੀਓ, ਦਿੱਤਾ ਮੋੜਵਾਂ ਜਵਾਬ

ਓਟਵਾ,13 ਸਤੰਬਰ, 2023: ਭਾਰਤ ਵਿਚ ਜੀ 20 ਸਿਖ਼ਰ ਸੰਮੇਲਨ ਵਿਚ ਹਿੱਸਾ ਲੈਣ ਆਏ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਆਪਣੇ ਦੇਸ਼ ਵਿਚ ਵਿਰੋਧੀ ਧਿਰ ਵੱਲੋਂ ਨਿਖੇਧੀ ਕਰਦਿਆਂ ਉਹਨਾਂ ਕੋਲ ਜੀ 20 ਸੰਮੇਲਨ ਵਿਚ ਦੋਸਤਾਂ ਦੀ ਘਾਟ ਹੋਣ ਦੀਆਂ ਕੀਤੀਆਂ ਟਿੱਪਣੀਆਂ ਤੋਂ ਬਾਅਦ ਟਰੂਡੋ ਨੇ ਜੀ 20 ਸੰਮੇਲਨ ਦੌਰਾਨ ਵਿਸ਼ਵ ਦੇ ਸਿਖ਼ਰਲੇ ਆਗੂਆਂ ਨਾਲ ਮੁਲਾਕਾਤ ਦੀ ਵੀਡੀਓ ਸਾਂਝੀ ਕੀਤੀ ਹੈ।
ਵੀਡੀਓ ਵਿਚ ਟਰੂਡੋ ਅਮਰੀਕੀ ਰਾਸ਼ਟਰਪਤੀ ਜੋਇ ਬਾਇਡਨ, ਬ੍ਰਿਟੇਨ ਦੇ ਪੀ ਐਮ ਰਿਸ਼ੀ ਸੂਨਕ, ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਹੋਰ ਆਗੂਆਂ ਨਾਲ ਮੁਲਾਕਾਤ ਕਰਦੇ ਨਜ਼ਰ ਆ ਰਹੇ ਹਨ। ਇਸਦੇ ਨਾਲ ਹੀ ਉਹਨਾਂ ਇੰਡੋਨੇਸ਼ੀਆ ਵਿਚ ਹੋਏ ਆਸੀਆਨ ਸੰਮੇਲਨ ਦੌਰਾਨ ਆਪਣੀਆਂ ਮੁਲਾਕਾਤਾਂ ਦੀ ਤਸਵੀਰ ਵੀ ਸਾਂਝੀ ਕੀਤੀ ਹੈ। ਉਹਨਾਂ ਕਿਹਾ ਹੈ ਕਿ ਅਸੀਂ ਜਿਥੇ ਮਰਜ਼ੀ ਜਾਈਏ ਸਾਡਾ ਟੀਚਾ ਸਿਰਫ ਕੈਨੇਡਾ ਦੇ ਲੋਕਾਂ ਦੀ ਬੇਹਤਰੀ ਹੈ।