ਸ਼੍ਰੀਨਗਰ ਵਿੱਚ ਸ਼ੀਆ ਭਾਈਚਾਰੇ ਨੇ ਤਿੰਨ ਦਹਾਕਿਆਂ ਮਗਰੋਂ ਮੁਹੱਰਮ ਦਾ ਜਲੂਸ ਕੱਢਿਆ

ਸ਼੍ਰੀਨਗਰ, 27 ਜੁਲਾਈ – ਸ਼੍ਰੀਨਗਰ ਵਿੱਚ ਲਗਭਗ ਤਿੰਨ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਬਾਅਦ ਸ਼ੀਆ ਭਾਈਚਾਰੇ ਨੇ ਗੁਰੂਬਾਜ਼ਾਰ ਤੋਂ ਡਲਗੇਟ ਰੋਡ ਤੇ ਮੁਹੱਰਮ ਦਾ ਜਲੂਸ ਕੱਢਿਆ, ਜਿਸ ਵਿੱਚ ਸੈਂਕੜੇ ਲੋਕਾਂ ਨੇ ਸ਼ਮੂਲੀਅਤ ਕੀਤੀ। ਜੰਮੂ-ਕਸ਼ਮੀਰ ਪ੍ਰਸ਼ਾਸਨ ਵੱਲੋਂ ਇਜਾਜ਼ਤ ਮਿਲਣ ਤੋਂ ਬਾਅਦ ਭਾਈਚਾਰੇ ਦੇ ਮੈਂਬਰਾਂ ਨੇ ਜਲੂਸ ਕੱਢਿਆ। ਅਧਿਕਾਰੀਆਂ ਨੇ ਜਲੂਸ ਨੂੰ ਰੁਝੇਵਿਆਂ ਵਾਲੇ ਲਾਲ ਚੌਕ ਖੇਤਰ ਵਿੱਚੋਂ ਲੰਘਣ ਲਈ ਸਵੇਰੇ 6 ਵਜੇ ਤੋਂ ਸਵੇਰੇ 8 ਵਜੇ ਤੱਕ ਦੋ ਘੰਟੇ ਦਾ ਸਮਾਂ ਦਿੱਤਾ ਸੀ। ਇਸ ਲਈ ਲੋਕ ਸਵੇਰੇ 5.30 ਵਜੇ ਦੇ ਕਰੀਬ ਗੁਰੂਬਾਜ਼ਾਰ ਵਿੱਚ ਇਕੱਠੇ ਹੋਏ। 90 ਦੇ ਦਹਾਕੇ ਵਿੱਚ ਕਸ਼ਮੀਰ ਵਿੱਚ ਅਤਿਵਾਦ ਫੈਲਣ ਤੋਂ ਬਾਅਦ ਮੁਹੱਰਮ ਦਾ ਜਲੂਸ ਨਹੀਂ ਕੱਢਿਆ ਗਿਆ।