ਔਕਲੈਂਡ, 4 ਸਤੰਬਰ 2025-ਨਿਊਜ਼ੀਲੈਂਡ ਇਮੀਗ੍ਰੇਸ਼ਨ ਨੇ ਅੱਜ ਉਨ੍ਹਾਂ ਲੋਕਾਂ ਦੀ ਅੱਪਡੇਟ ਜਾਰੀ ਕੀਤੀ ਜੋ ਇਸ ਸਮੇਂ ਨਿਊਜ਼ੀਲੈਂਡ ਵਿੱਚ ਵੀਜ਼ੇ ਦੀ ਮਿਆਦ ਤੋਂ ਵੱਧ ਜਾਂ ਵੀਜ਼ਾ ਖਤਮ ਹੋਣ ਦੇ ਬਾਵਜੂਦ ਗੈਰ ਕਾਨੂੰਨੀ ਹੋ ਕੇ ਰਹਿ ਰਹੇ ਹਨ। ਇਸ ਸ਼੍ਰੇਣੀ ਨੂੰ ਓਵਰਸਟੇਅਰ ਵੀ ਕਿਹਾ ਜਾਂਦਾ ਹੈ। ਨਵੀਨਤਮ ਅੰਦਾਜ਼ੇ ਤੋਂ ਪਤਾ ਚੱਲਦਾ ਹੈ ਕਿ 1 ਜੁਲਾਈ 2025 ਤੱਕ, ਲਗਭਗ 20,980 ਲੋਕ ਨਿਊਜ਼ੀਲੈਂਡ ਵਿੱਚ ਅਜਿਹੇ ਸਨ ਜੋ ਆਪਣੇ ਵੀਜ਼ੇ ਦੀ ਮਿਆਦ ਤੋਂ ਵੱਧ ਰਹੇ ਸਨ।
ਇਹ ਅਨੁਮਾਨ ਇਮੀਗ੍ਰੇਸ਼ਨ ਨੇ ਨਵੀਂ ਵਿਧੀ ਦੀ ਵਰਤੋਂ ਕਰਕੇ ਤਿਆਰ ਕੀਤਾ ਹੈ, ਜਿਸਨੇ 2017 ਵਿੱਚ ਕੀਤੇ ਗਏ ਪਿਛਲੇ ਅਨੁਮਾਨ ਦੇ ਮੁਕਾਬਲੇ ਗਿਣਤੀ ਦੀ ਸ਼ੁੱਧਤਾ ਵਿੱਚ ਕਾਫ਼ੀ ਸੁਧਾਰ ਕੀਤਾ ਹੈ। ਉਸ ਅਨੁਮਾਨ ਵਿੱਚ ਵੀਜ਼ਾ ਮਿਆਦ ਤੋਂ ਵੱਧ ਰਹਿਣ ਵਾਲਿਆਂ ਦੀ ਗਿਣਤੀ ਲਗਭਗ 14,000 ਸੀ, ਪਰ ਵੱਖ-ਵੱਖ ਵਿਧੀਆਂ ਦੀ ਵਰਤੋਂ ਕਾਰਨ ਦੋਵਾਂ ਅਨੁਮਾਨਾਂ ਦੀ ਸਿੱਧੀ ਤੁਲਨਾ ਨਹੀਂ ਕੀਤੀ ਜਾ ਸਕਦੀ।
ਇਮੀਗ੍ਰੇਸ਼ਨ ਕੰਪਲਾਈਂਸ ਅਤੇ ਜਾਂਚ ਦੇ ਜਨਰਲ ਮੈਨੇਜਰ, ਸਟੀਵ ਵਾਟਸਨ ਨੇ ਕਿਹਾ ਕਿ ਇਹ ਅਨੁਮਾਨ ਦਰਸਾਉਂਦਾ ਹੈ ਕਿ ਜਿਹੜੇ ਲੋਕ ਆਪਣੇ ਵੀਜ਼ੇ ਦੀ ਮਿਆਦ ਤੋਂ ਵੱਧ ਰਹਿੰਦੇ ਹਨ, ਉਹ ਨਿਊਜ਼ੀਲੈਂਡ ਆਉਣ ਵਾਲੇ ਅਸਥਾਈ ਪ੍ਰਵਾਸੀਆਂ ਦਾ ਬਹੁਤ ਛੋਟਾ ਹਿੱਸਾ ਹਨ ਅਤੇ ਇਨ੍ਹਾਂ ਨੂੰ ਘਟਾਉਣ ਲਈ ਸਪੱਸ਼ਟ ਯੋਜਨਾਵਾਂ ਹਨ। ਹਰ ਸਾਲ, ਨਿਊਜ਼ੀਲੈਂਡ ਲਗਭਗ 10 ਲੱਖ ਵੀਜ਼ਾ ਅਰਜ਼ੀਆਂ ਅਤੇ 16 ਲੱਖ ਨਿਊਜ਼ੀਲੈਂਡ ਇਲੈਕਟਰਾਨਿਕ ਟਰੈਵਲ ਅਥਾਰਿਟੀ ਦੀਆਂ ਬੇਨਤੀਆਂ ਨੂੰ ਪ੍ਰੋਸੈਸ ਕਰਦਾ ਹੈ ਅਤੇ ਹਰ ਸਾਲ ਗ਼ੈਰ-ਨਿਊਜ਼ੀਲੈਂਡ ਨਾਗਰਿਕਾਂ ਵੱਲੋਂ ਲਗਭਗ 36 ਲੱਖ ਦੀ ਆਮਦ ਦੇਖਦਾ ਹੈ। ਹਾਲਾਂਕਿ, ਬਹੁਤੇ ਲੋਕ ਆਪਣੇ ਵੀਜ਼ੇ ਦੀਆਂ ਸ਼ਰਤਾਂ ਦੀ ਪਾਲਣਾ ਕਰਦੇ ਹਨ ਅਤੇ ਵੀਜ਼ਾ ਦੀ ਮਿਆਦ ਖ਼ਤਮ ਹੋਣ ਤੋਂ ਪਹਿਲਾਂ ਚਲੇ ਜਾਂਦੇ ਹਨ, ਬਦਕਿਸਮਤੀ ਨਾਲ ਕੁਝ ਲੋਕ ਨਹੀਂ ਜਾਂਦੇ ਅਤੇ ਨਤੀਜੇ ਵਜੋਂ ਨਿਊਜ਼ੀਲੈਂਡ ਵਿੱਚ ਗੈਰ-ਕਾਨੂੰਨੀ ਤੌਰ ’ਤੇ ਰਹਿੰਦੇ ਹਨ।”
ਇਮੀਗ੍ਰੇਸ਼ਨ ਵਿਭਾਗ ਵੀਜ਼ਾ ਧਾਰਕ ਨਾਲ ਸਰਗਰਮੀ ਨਾਲ ਜੁੜਿਆ ਰਹਿੰਦਾ ਹੈ ਅਤੇ ਉਨ੍ਹਾਂ ਨੂੰ ਉਨ੍ਹਾਂ ਦੀਆਂ ਜ਼ਿੰਮੇਵਾਰੀਆਂ ਦੀ ਯਾਦ ਦਿਵਾਉਣ ਲਈ ਪਹਿਲਕਦਮੀ ਨਾਲ ਟੈਕਸਟ, ਫ਼ੋਨ, ਈਮੇਲ ਅਤੇ ਚਿੱਠੀਆਂ ਭੇਜਦਾ ਹੈ।
ਦੇਸ਼ ਨਿਕਾਲੇ ਦੀ ਜਾਣਕਾਰੀ
1 ਜੁਲਾਈ 2024 ਤੋਂ 30 ਜੂਨ 2025 ਦੇ ਵਿੱਤੀ ਸਾਲ ਵਿੱਚ, 1,259 ਗੈਰ-ਕਾਨੂੰਨੀ ਲੋਕਾਂ ਨੂੰ ਇਮੀਗ੍ਰੇਸ਼ਨ ਦੁਆਰਾ ਦੇਸ਼ ਨਿਕਾਲਾ ਦਿੱਤਾ ਗਿਆ, ਉਹਨਾਂ ਨੇ ਆਪਣੇ-ਆਪ ਦੇਸ਼ ਛੱਡਿਆ ਜਾਂ ਸਵੈ-ਇੱਛਾ ਨਾਲ ਨਿਊਜ਼ੀਲੈਂਡ ਛੱਡਿਆ, ਜੋ ਕਿ ਪਿਛਲੇ ਵਿੱਤੀ ਸਾਲ ਤੋਂ 352 ਦਾ ਵਾਧਾ ਹੈ। ਪਿਛਲੇ ਕੁਝ ਸਾਲਾਂ ਤੋਂ ਸਾਡੇ ਕੰਪਲਾਈਂਸ ਯਤਨ ਮੁੱਖ ਤੌਰ ’ਤੇ ਅਪਰਾਧਿਕ ਗਤੀਵਿਧੀਆਂ ਵਰਗੀਆਂ ਸਥਿਤੀਆਂ ਨੂੰ ਪਹਿਲੀ ਤਰਜੀਹ ਦੇ ਤੌਰ ’ਤੇ ਹੱਲ ਕਰਨ ’ਤੇ ਕੇਂਦਰਿਤ ਹਨ, ਖਾਸ ਕਰਕੇ ਉਹ ਜੋ ਰਾਸ਼ਟਰੀ ਸੁਰੱਖਿਆ ਲਈ ਖ਼ਤਰਾ ਪੈਦਾ ਕਰਦੇ ਹਨ। ਅਸੀਂ ਪਿਛਲੇ ਦੋ ਸਾਲਾਂ ਵਿੱਚ ਕੰਪਲਾਈਂਸ ਦੇ ਖੇਤਰ ਵਿੱਚ ਆਪਣੀ ਉਤਪਾਦਕਤਾ ਵਿੱਚ ਕਾਫ਼ੀ ਸੁਧਾਰ ਕੀਤਾ ਹੈ ਅਤੇ ਇਸ ਨਾਲ ਹਾਲ ਹੀ ਦੇ ਸਾਲਾਂ ਵਿੱਚ ਸਾਡੇ ਦੇਸ਼ ਨਿਕਾਲੇ ਦੀਆਂ ਸੰਖਿਆਵਾਂ ਵਿੱਚ ਵਾਧਾ ਹੋਇਆ ਹੈ। ਸਾਡਾ ਸੰਚਾਲਨ ਫੋਕਸ ਇਹ ਯਕੀਨੀ ਬਣਾਉਣਾ ਹੈ ਕਿ ਜੋ ਲੋਕ ਨਿਊਜ਼ੀਲੈਂਡ ਲਈ ਸਭ ਤੋਂ ਵੱਡਾ ਖ਼ਤਰਾ ਹਨ, ਉਨ੍ਹਾਂ ਨੂੰ ਦੇਸ਼ ਨਿਕਾਲਾ ਦਿੱਤਾ ਜਾਵੇ।
ਕਿਸ ਦੇਸ਼ ਦੇ ਕਿੰਨੇ ਲੋਕ?
ਟੋਂਗਾ – 2,599, ਚੀਨ – 2,577, ਅਮਰੀਕਾ – 2,213, ਸਮੋਆ – 1,697, ਭਾਰਤ – 1,582, ਬਰਤਾਨੀਆ – 1,256, ਫਿਲੀਪੀਨਜ਼ – 938, ਮਲੇਸ਼ੀਆ – 753, ਕੈਨੇਡਾ – 510, ਜਰਮਨੀ – 498, ਹੋਰ – 6,356 =ਕੁੱਲ – 20,979
ਭਾਰਤ: ਭਾਰਤ ਤੋ 1 ਜੁਲਾਈ 2023 ਤੋਂ ਲੈ ਕੇ 30 ਜੂਨ 2025 ਤੱਕ 2 ਲੱਖ 22 ਹਜ਼ਾਰ 428 ਲੋਕ ਇਥੇ ਅਸਥਾਈ ਵੀਜ਼ੇ ਉਤੇ ਆਏ ਅਤੇ ਇਨ੍ਹਾਂ ਵਿਚੋਂ 428 ਲੋਕ ਗੈਰ ਕਾਨੂੰਨੀ ਹੋ ਕੇ ਇਥੇ ਹੀ ਰਹਿ ਗਏ ਅਤੇ ਓਵਰਸਟੇਅਰ ਬਣ ਗਏ। ਇਹ ਦਰ 0.19% ਹੈ। ਸਭ ਤੋਂ ਜਿਆਦਾ ਦਰ ਟੌਂਗਾ ਦੀ ਹੈ ਇਹ ਇਸੇ ਸਮੇਂ ਦੌਰਾਨ ਸਿਰਫ 24,425 ਆਏ ਅਤੇ 472 ਗੈਰ ਕਾਨੂੰਨੀ ਹੋ ਗਏ, ਸਾਮੋਆ ਤੋਂ 23,075 ਆਏ ਅਤੇ 382 ਇਥੇ ਹੀ ਰਹਿ ਗਏ, ਮਲੇਸ਼ੀਆ ਤੋਂ 64,865 ਆਏ ਅਤੇ 220 ਇਥੇ ਹੀ ਰਹਿ ਗਏ। ਗੈਰ ਕਾਨੂੰਨੀ ਹੋਣ ਵਾਲਿਆਂ ਵਿਚ 0-19 ਸਾਲ ਦੇ 1733, 20 ਤੋਂ 64 ਸਾਲ ਦੇ 16,164 ਅਤੇ 65 ਤੋਂ 99 ਸਾਲ ਦੇ 3082 ਲੋਕ ਹਨ।
