ਆਖਿਰ ਕਿਉਂ ਚਰਚਾ ਵਿੱਚ ਬਣ ਗਿਆ ਹੈ, ਮਾਲਵੇ ਦਾ ਸੁਪਰ ਹੀਰੋ ਜਿਓਣਾ ਮੌੜ

ਕੋਟਕਪੂਰਾ: 6 ਜੂਨ 2023 : ਅੱਜਕਲ ਪੰਜਾਬ ਵਿੱਚ ਡਾਕੂ ਜਿਓਣਾ ਮੌੜ ਦੀ ਕਾਫੀ ਚਰਚਾ ਹੋ ਰਹੀ ਹੈ। ਜਿਸਦਾ ਵੱਡਾ ਕਾਰਨ ਇਹ ਹੈ ਕਿ 9 ਜੂਨ 2023 ਨੂੰ ਇਕੋ ਦਿਨ ਜਿਊਣਾ ਮੌੜ ਦੀ ਕਹਾਣੀ ਤੇ ਦੋ ਫਿਲਮਾਂ ਰਿਲੀਜ਼ ਹੋ ਰਹੀਆਂ ਹਨ। ਡਾਕੂ ਜਿਊਣਾ ਮੌੜ ਨੂੰ ਪੰਜਾਬ ਦਾ ਰੋਬਿਨਹੁੱਡ ਮੰਨਿਆ ਜਾਂਦਾ ਹੈ। ਚਰਚਾ ਦਾ ਵੱਡਾ ਕਾਰਣ ਇਹ ਹੈ ਕਿ ਇਨ੍ਹਾਂ ਦੋਨਾਂ ਫਿਲਮਾਂ ਵਿਚੋਂ ਇਕ ਫਿਲਮ ਅੱਜ ਤੋਂ ਠੀਕ 31 ਸਾਲ ਪਹਿਲਾਂ ਰਿਲੀਜ ਹੋਈ ਫਿਲਮ ਜੱਟ ਜਿਊਣਾ ਮੌੜ ਹੈ। ਜਿਸਨੂੰ ਨਵੀਂ ਤਕਨੀਕ ਨਾਲ ਸੋਧ ਕੇ ਡੋਲਬੀ ਡਿਜੀਟਲ ਰੂਪ ਦੇਕੇ ਮੁੜ ਤੋਂ ਰਿਲੀਜ਼ ਕੀਤਾ ਜਾ ਰਿਹਾ ਹੈ। ਗੁੱਗੂ ਗਿਲ ਦਾ ਕਹਿਣਾ ਹੈ ਕਿ ਫਿਲਮ ਨੂੰ ਦੁਬਾਰਾ ਰਿਲੀਜ ਕਰਨ ਦਾ ਮਕਸਦ ਬੇਢੰਗੇ ਵਿਸ਼ਿਆਂ ਨਾਲ ਭੱਟਕ ਰਹੇ ਪੰਜਾਬੀ ਸਿਨੇਮਾ ਦੀ ਸਾਰਥਿਕਤਾ ਨੂੰ ਕਾਇਮ ਰੱਖਣਾ ਹੈ। ਸਿਰਫ 30 ਲੱਖ ਰੁਪਏ ਵਿਚ ਬਣੀ ਇਹ ਫਿਲਮ ਪੰਜਾਬ ਸਮੇਤ ਭਾਰਤ ਦੀਆਂ ਕਈ ਹੋਰ ਥਾਵਾਂ ਤੇ ਬਲਾਕਬਸਟਰ ਸਾਬਿਤ ਹੋਈ ਸੀ। ਜੋ ਹੁਣ ਤੱਕ ਕਰੋੜਾਂ ਰੁਪਏ ਦਾ ਕਾਰੋਬਾਰ ਕਰ ਚੁੱਕੀ ਹੈ।