ਕੋਚੀ, 1 ਨਵੰਬਰ -ਮਿਸ ਕੇਰਲ ਮੁਕਾਬਲੇ ਦੀ ਸਾਬਕਾ ਜੇਤੂ ਅਤੇ ਦੂਜੇ ਸਥਾਨ ਤੇ ਰਹੀ ਦੋਵੇਂ ਲੜਕੀਆਂ ਦੀ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ। ਪੁਲੀਸ ਨੇ ਦੱਸਿਆ ਕਿ ਤਿਰੂਵਨੰਤਪੁਰਮ ਵਾਸੀ 24 ਸਾਲਾ ਅੰਸੀ ਕਬੀਰ ਅਤੇ ਤ੍ਰਿਸ਼ੂਲ ਵਾਸੀ ਅੰਜਨਾ ਸ਼ਾਜਨ ਦੀ ਕਾਰ ਇੱਕ ਮੋਟਰਸਾਈਕਲ ਨਾਲ ਟੱਕਰ ਹੋਣ ਤੋਂ ਬਚਾਉਣ ਦੀ ਕੋਸ਼ਿਸ਼ ਵਿੱਚ ਅਚਾਨਕ ਘੁੰਮ ਗਈ ਅਤੇ ਹਾਦਸੇ ਦਾ ਸ਼ਿਕਾਰ ਹੋ ਗਈ।
ਇਹ ਹਾਦਸਾ ਬੀਤੀ ਦੇਰ ਰਾਤ ਕਰੀਬ 1 ਵਜੇ ਵਾਪਰਿਆ। ਕਾਰ ਵਿੱਚ ਸਵਾਰ ਦੋ ਹੋਰ ਵਿਅਕਤੀ ਜ਼ਖਮੀ ਹੋ ਗਏ ਹਨ। ਪੁਲੀਸ ਨੇ ਦੱਸਿਆ ਕਿ ਉਨ੍ਹਾਂ ਨਾਲ ਕਾਰ ਵਿੱਚ ਸਵਾਰ ਇੱਕ ਵਿਅਕਤੀ ਨੂੰ ਨੇੜੇ ਦੇ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ ਅਤੇ ਉਸ ਦੀ ਹਾਲਤ ਗੰਭੀਰ ਹੈ। ਉਹ ਤ੍ਰਿਸ਼ੂਲ ਦੇ ਮਾਲਾ ਦਾ ਵਾਸੀ ਹੈ। ਹਾਲਾਂਕਿ ਜ਼ਖਮੀ ਹੋਏ ਹੋਰ ਇੱਕ ਵਿਅਕਤੀ ਦੀ ਹਾਲਤ ਸਥਿਰ ਹੈ।
ਪੁਲੀਸ ਨੂੰ ਸ਼ੱਕ ਹੈ ਕਿ ਸਿਰਫ ਡਰਾਈਵਰ ਨੇ ਹੀ ਸੀਟ ਬੈਲਟ ਲਾਈ ਸੀ। ਅੰਸੀ ਕਬੀਰ ਅਤੇ ਅੰਜਨਾ ਸ਼ਾਜਨ ਨੇ ਸਾਲ 2019 ਵਿੱਚ ਮਿਸ ਕੇਰਲ ਮੁਕਾਬਲੇ ਵਿੱਚ ਹਿੱਸਾ ਲਿਆ ਸੀ। ਅੰਸੀ ਇਸ ਮੁਕਾਬਲੇ ਦੀ ਜੇਤੂ ਸੀ ਅਤੇ ਅੰਜਨਾ ਦੂਜੇ ਸਥਾਨ ਤੇ ਰਹੀ ਸੀ।
