ਵਾਸ਼ਿੰਗਟਨ, 16 ਸਤੰਬਰ – ਪੁਲਾੜ ਯਾਤਰਾ ਦਾ ਜਨੂੰਨ ਰੱਖਣ ਵਾਲਿਆਂ ਦੀ ਕਤਾਰ ਵਿੱਚ ਇਕ ਹੋਰ ਮਿਸ਼ਨ ਜੁੜ ਗਿਆ ਹੈ। ਕਾਰੋਬਾਰੀ ਐਲਨ ਮਸਕ ਦੀ ਕੰਪਨੀ ਸਪੈਸ ਐਕਸ ਦਾ ਪਹਿਲਾ ਆਲ-ਸਿਵਿਲਅਨ ਕਰੂ ਦਲ ਬੀਤੀ ਰਾਤ ਪੁਲਾੜ ਵੱਲ ਰਵਾਨਾ ਹੋ ਗਿਆ। ਕੰਪਨੀ ਨੇ ਪਹਿਲੀ ਵਾਰ 4 ਆਮ ਵਿਅਕਤੀਆਂ ਨੂੰ ਪੁਲਾੜ ਵਿੱਚ ਭੇਜਿਆ। ਇਸ ਮਿਸ਼ਨ ਨੂੰ ਇੰਸਪਿਰੇਸ਼ਨ 4 ਨਾਮ ਦਿੱਤਾ ਗਿਆ ਹੈ। ਖਾਸ ਗੱਲ ਇਹ ਹੈ ਕਿ ਧਰਤੀ ਦੇ ਪੰਧ ਵਿੱਚ ਜਾਣ ਵਾਲਾ ਇਹ ਪਹਿਲਾ ਗੈਰ ਪੇਸ਼ੇਵਰ ਪੁਲਾੜ ਯਾਤਰੀਆਂ ਦਾ ਦਲ ਹੈ। ਪੁਲਾੜ ਵਿੱਚ ਜਾਣ ਵਾਲੇ ਚਾਰੇ ਯਾਤਰੀ ਡ੍ਰੈਗਨ ਕੈਪਸੂਲ ਜ਼ਰੀਏ ਸਪੇਸ ਵੱਲ ਰਵਾਨਾ ਹੋਏ ਹਨ। ਇਹ ਯਾਤਰੀ ਇੰਟਰਨੈਸ਼ਨਲ ਸਪੇਸ ਸਟੇਸ਼ਨ ਤੋਂ 160 ਕਿਲੋਮੀਟਰ ਉੱਚੇ ਪੰਧ ਤੋਂ ਦੁਨੀਆ ਦਾ ਚੱਕਰ ਲਗਾਉਂਦੇ ਹੋਏ ਪੁਲਾੜ ਵਿੱਚ 3 ਦਿਨ ਬਿਤਾਉਣਗੇ। ਇਸ ਤੋਂ ਬਾਅਦ ਸਪੇਸਕ੍ਰਾਫਟ ਧਰਤੀ ਦੇ ਵਾਯੂਮੰਡਲ ਵਿੱਚ ਫਿਰ ਤੋਂ ਦਾਖਲ ਹੋਵੇਗਾ ਅਤੇ ਫਲੋਰਿਡਾ ਦੇ ਤੱਟ ਤੋਂ ਹੇਠਾਂ ਉਤਰੇਗਾ।
ਇਸ ਮਿਸ਼ਨ ਦੀ ਕਮਾਂਡ 38 ਸਾਲ ਦੇ ਇਸਾਕਮੈਨ ਦੇ ਹੱਥਾਂ ਵਿੱਚ ਹੈ। ਇਸਾਕਮੈਨ ਪੇਮੇਂਟ ਕੰਪਨੀ ਦੇ ਫਾਊਂਡਰ ਅਤੇ ਸੀ. ਈ. ਓ. ਹਨ। ਉਹਨਾਂ ਨੇ 16 ਸਾਲ ਦੀ ਉਮਰ ਵਿੱਚ ਇਸ ਕੰਪਨੀ ਦੀ ਸ਼ੁਰੂਆਤ ਕੀਤੀ ਸੀ। ਇਹ ਸਪੇਸਐਕਸ ਦੇ ਸੰਸਥਾਪਕ ਐਲਨ ਮਸਕ ਦੀ ਸਪੇਸ ਟੂਰਿਜ਼ਮ ਦੀ ਦੁਨੀਆ ਵਿੱਚ ਪਹਿਲੀ ਐਂਟਰੀ ਹੈ। ਇਸ ਤੋਂ ਪਹਿਲਾਂ ਬਲੂ ਓਰੀਜ਼ਨ ਅਤੇ ਵਰਜਿਨ ਸਪੇਸ ਸ਼ਿਪ ਨੇ ਵੀ ਪ੍ਰਾਈਵੇਟ ਸਪੇਸ ਟੂਰਿਜ਼ਮ ਦੀ ਸ਼ੁਰੂਆਤ ਕਰਦਿਆਂ ਉਡਾਣ ਭਰੀ ਸੀ। ਇਸਾਕਮੈਨ ਤੋਂ ਇਲਾਵਾ ਇਸਟ੍ਰਿਪ ਵਿੱਚ ਹੇਯਲੀ ਆਰਕੇਨੋ ਵੀ ਹਨ। 29 ਸਾਲ ਦੀ ਹੇਯਲੀ ਕੈਂਸਰ ਸਰਵਾਈਵਰ ਹੈ। ਉਹ ਸੈਂਟ ਜੂਡ ਚਿਲਡਰਨ ਰਿਸਰਚ ਹਸਪਤਾਲ ਵਿੱਚ ਸਹਾਇਕ ਡਾਕਟਰ ਹਨ। ਮਿਸ਼ਨ ਨੂੰ ਲੀਡ ਕਰ ਰਹੇ ਇਸਾਕਮੈਨ ਨੇ ਹਸਪਤਾਲ ਨੂੰ 100 ਮਿਲੀਅਨ ਡਾਲਰ ਦੀ ਰਾਸ਼ੀ ਦੇਣ ਦਾ ਵਾਅਦਾ ਕੀਤਾ ਹੈ। ਉਹ ਇਸ ਮਿਸ਼ਨ ਤੋਂ 100 ਮਿਲੀਅਨ ਡਾਲਰ ਹੋਰ ਜੁਟਾਉਣਾ ਚਾਹੁੰਦੇ ਹਨ।
ਇਹਨਾਂ ਦੋ ਵਿਅਕਤੀਆਂ ਤੋਂ ਇਲਾਵਾ ਇਸ ਯਾਤਰਾ ਤੇ ਜਾਣ ਵਾਲੇ ਵਿਅਕਤੀ ਵਿੱਚ ਅਮਰੀਕੀ ਏਅਰਫੋਰਸ ਦੇ ਪਾਇਲਟ ਰਹੇ ਸੇਮਬ੍ਰੋਸਕੀ ਅਤੇ 51 ਸਾਲ ਦੇ ਸ਼ਾਨ ਪ੍ਰੋਕਟਰ ਵੀ ਸ਼ਾਮਲ ਹਨ। 51 ਸਾਲ ਦੇ ਪ੍ਰੋਕਟਰ ਏਰੀਜ਼ੋਨਾ ਦੇ ਇਕ ਕਾਲਜ ਵਿੱਚ ਭੂ-ਵਿਗਿਆਨ ਦੀ ਪ੍ਰੋਫੈਸਰ ਹਨ। ਹੇਯਲੀ ਪੁਲਾੜ ਵਿੱਚ ਜਾਣ ਵਾਲੀ ਸਭ ਤੋਂ ਘੱਟ ਉਮਰ ਦੀ ਅਮਰੀਕੀ ਨਾਗਰਿਕ ਹਨ। ਨਾਸਾ ਦੇ ਫਲੋਰਿਡਾ ਸਥਿਤ ਕੈਨੇਡੀ ਸਪੇਸ ਰਿਸਰਚ ਸੈਂਟਰ ਤੋਂ ਫਾਲਕਨ-9 ਰਾਕੇਟ ਨੇ ਉਡਾਣ ਭਰੀ। ਇਸ ਵਾਰ ਡ੍ਰੈਗਨ ਕੈਪਸੂਲ 357 ਮੀਲ ਮਤਲਬ ਕਰੀਬ 575 ਕਿਲੋਮੀਟਰ ਦੀ ਉੱਚਾਈ ਤੇ ਧਰਤੀ ਦੇ ਪੰਧ ਵਿੱਚ ਪਹੁੰਚੇਗਾ। ਇਹ ਹਬਲ ਸਪੇਸ ਟੈਲੀਸਕੋਪ ਤੋਂ ਠੀਕ ਅੱਗੇ ਤੱਕ।
ਜਿਕਰਯੋਗ ਹੈ ਕਿ 2009 ਤੋਂ ਬਾਅਦ ਕਿਸੇ ਵੀ ਮਨੁੱਖ ਨੇ ਇੰਨੀ ਦੂਰੀ ਤੱਕ ਪੁਲਾੜ ਦੀ ਯਾਤਰਾ ਨਹੀਂ ਕੀਤੀ ਹੈ। ਉਸ ਵੇਲੇ ਪੁਲਾੜ ਯਾਤਰੀਆਂ ਨੇ ਹਬਲ ਸਪੇਸ ਟੇਲੀਸਕੋਪ ਦਾ ਦੌਰਾ ਕੀਤਾ ਸੀ। ਪੁਲਾੜ ਗੱਡੀ ਧਰਤੀ ਦਾ ਚੱਕਰ ਲਗਾਏਗੀ ਪਰ ਪੁਲਾੜ ਸਟੇਸ਼ਨ ਤੇ ਡੌਕ ਨਹੀਂ ਕਰੇਗੀ। ਪਹਿਲੀ ਵਾਰ ਸਿਰਫ ਆਮ ਨਾਗਰਿਕਾਂ ਨੂੰ ਲੈਕੇ ਇਕ ਪੁਲਾੜ ਗੱਡੀ ਧਰਤੀ ਤੋਂ ਲਾਂਚ ਹੋਈ ਹੈ। ਸਿਰਫ ਪੰਜ ਮਹੀਨਿਆਂ ਦੀ ਸਿਖਲਾਈ ਤੋਂ ਬਾਅਦ 4 ਆਮ ਲੋਕ ਪੁਲਾੜ ਲਈ ਰਵਾਨਾ ਹੋਏ। ਇਸ ਮਿਸ਼ਨ ਦੀ ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਸ ਦੇ ਚਾਲਕ ਦਲ ਵਿੱਚ ਕੋਈ ਵੀ ਪੇਸ਼ੇਵਰ ਪੁਲਾੜ ਯਾਤਰੀ ਨਹੀਂ ਹੈ। ਟੇਸਲਾ ਦੇ ਮਾਲਕ ਐਲਨ ਮਸਕ ਦੀ ਕੰਪਨੀ ਸਪੇਸਐਕਸ ਜਿਹੜੇ ਸਪੇਸਸ਼ਿਪ ਵਿੱਚ ਨਾਗਰਿਕਾਂ ਨੂੰ ਲਿਜਾਏਗੀ ਉਸ ਵਿੱਚ ਕਈ ਸਾਰੀਆਂ ਖਾਸੀਅਤਾਂ ਹਨ।