ਫਾਜ਼ਿਲਕਾ, 4 ਦਸੰਬਰ 2023 : ਮੁੱਖ ਮੰਤਰੀ ਸ: ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਵੱਲੋਂ ਸਾਲ ਭਰ ਦਿੱਤੇ ਭਰਪੂਰ ਨਹਿਰੀ ਪਾਣੀ ਅਤੇ ਜ਼ਿਲ੍ਹੇ ਦੇ ਬਾਗਬਾਨਾਂ ਦੀ ਸਖ਼ਤ ਮਿਹਨਤ ਨੇ ਇਸ ਵਾਰ ਕਿਨੂੰ ਦੀ ਰਿਕਾਰਡ ਪੈਦਾਵਾਰ ਕੀਤੀ ਹੈ।ਇਸ ਵਾਰ ਕਿਨੂੰ ਉਤਪਾਦਨ ਦੇ ਪਿੱਛਲੇ ਰਿਕਾਰਡ ਟੁੱਟ ਰਹੇ ਹਨ ਅਤੇ ਇਸ ਬੰਪਰ ਫਸਲ ਕਰਕੇ ਪੰਜਾਬ ਦਾ ਮਾਣ ਕਿਨੂੰ ਹੁਣ ਲੋਕਾਂ ਨੂੰ ਸਿਹਤਯਾਬੀ ਦਾ ਆਸਿ਼ਰਵਾਦ ਦੇਣ ਲਈ ਇੱਥੋਂ ਦੇਸ਼ ਭਰ ਦੀਆਂ ਮੰਡੀਆਂ ਲਈ ਰਵਾਨਾ ਹੋਣ ਲੱਗਿਆ ਹੈ।
ਪੰਜਾਬ ਵਿਚ ਫਲਾਂ ਹੇਠ ਰਕਬਾ ਲਗਭਗ 97 ਹਜਾਰ ਹੈਕਟੇਅਰ ਹੈ ਅਤੇ ਇਸ ਵਿਚੋਂ 46841 ਹੈਕਟੇਅਰ ਰਕਬਾ ਕਿਨੂੰ ਦੀ ਕਾਸਤ ਹੇਠ ਹੈ। ਇਸ ਵਿਚੋਂ ਵੀ 38326 ਹੈਕਟੇਅਰ ਕਿਨੂੰ ਸਿਰਫ ਫਾਜ਼ਿਲਕਾ ਜ਼ਿਲ੍ਹੇ ਪੈਦਾ ਕਰਦਾ ਹੈ। ਦੇਸ਼ ਦਾ ਸਭ ਤੋਂ ਬਿਹਤਰ ਕਿਨੂੰ ਫਾਜਿ਼ਲਕਾ ਦੇ ਅਬੋਹਰ ਅਤੇ ਖੂਈਆਂ ਸਰਵਰ ਬਲਾਕਾਂ ਵਿਚ ਹੁੰਦਾ ਹੈ।
ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਡਾ: ਸੇਨੂ ਦੁੱਗਲ ਨੇ ਜ਼ਿਲ੍ਹੇ ਦੇ ਕਿਸਾਨਾਂ ਨੂੰ ਬੰਪਰ ਪੈਦਾਵਾਰ ਲਈ ਵਧਾਈ ਦਿੱਤੀ ਹੈ ਅਤੇ ਉਨ੍ਹਾਂ ਦੀ ਸਖ਼ਤ ਮਿਹਨਤ ਨੂੰ ਸਿਜਦਾ ਕੀਤਾ ਹੈ ਜੋ ਕਿਨੂੰ ਦੇ ਰਾਹੀਂ ਦੇਸ਼ ਭਰ ਵਿਚ ਫਾਜ਼ਿਲਕਾ ਦਾ ਨਾਂਅ ਰੌਸ਼ਨ ਕਰਦੇ ਹਨ।ਜਿਕਰਯੋਗ ਹੈ ਕਿ ਇਕ ਜ਼ਿਲ੍ਹੇ ਇਕ ਉਤਪਾਦ ਪ੍ਰੋਗਰਾਮ ਤਹਿਤ ਵੀ ਫਾਜ਼ਿਲਕਾ ਜ਼ਿਲ੍ਹੇ ਦਾ ਉਤਪਾਦ ਕਿਨੂੰ ਹੈ।
ਬਾਗਬਾਨੀ ਵਿਭਾਗ ਦੇ ਸਹਾਇਕ ਡਾਇਰੈਕਟਰ ਸ੍ਰੀ ਜਤਿੰਦਰ ਸਿੰਘ ਅਨੁਸਾਰ ਪਿੱਛਲੇ ਸਾਲ ਜਿੱਥੇ ਕਿਨੂੰ ਦਾ ਔਸਤ ਝਾੜ 125 ਕਿਉਂਟਲ ਪ੍ਰਤੀ ਹੈਕਟੇਅਰ ਸੀ ਜਦ ਕਿ ਇਸ ਵਾਰ ਜਿੰਨ੍ਹਾਂ ਕਿਸਾਨਾਂ ਨੇ ਫਲ ਦੀ ਤੁੜਾਈ ਸ਼ੁਰੂ ਕੀਤੀ ਹੈ ਉਨ੍ਹਾਂ ਅਨੁਸਾਰ ਇਸ ਵਾਰ ਕਿਨੂੰ ਦਾ ਪ੍ਰਤੀ ਹੈਕਟੇਅਰ 350 ਕਿਉਂਟਲ ਨਿਕਲ ਰਿਹਾ ਹੈ।ਇਸ ਸਾਲ ਲਗਭਗ 11 ਲੱਖ ਟਨ ਕਿਨੂੰ ਹੋਣ ਦੀ ਆਸ ਹੈ।
ਕਿਸਾਨਾਂ ਦਾ ਕਹਿਣਾ ਹੈ ਇਸ ਵਾਰ ਬੰਪਰ ਫਸਲ ਦਾ ਕਾਰਨ ਮੌਸਮ ਅਨੁਕੂਲ ਰਹਿਣਾ ਅਤੇ ਕਿਨੂੰ ਦੀ ਸਿੰਚਾਈ ਲਈ ਨਿਯਮਤ ਤੌਰ ਤੇ ਨਹਿਰਾਂ ਦੀਆਂ ਟੇਲਾਂ ਤੱਕ ਪੂਰਾ ਪਾਣੀ ਮਿਲਣਾ ਹੈ। ਕਿਨੂੰ ਇਕ ਅਜਿਹੀ ਫਸਲ ਹੈ ਜਿਸਨੂੰ ਟਿਊਬਵੇਲ ਦਾ ਪਾਣੀ ਨਹੀਂ ਲਗਾਇਆ ਜਾ ਸਕਦਾ ਅਤੇ ਇਹ ਪੂਰੀ ਤਰਾਂ ਨਹਿਰੀ ਪਾਣੀ ਤੇ ਨਿਰਭਰ ਹੈ। ਇਸੇ ਕਾਰਨ ਇਸ ਵਾਰ ਪਿਛਲੇ ਸਾਲ ਦੇ ਮੁਕਾਬਲੇ ਉਤਪਾਦਨ ਲਗਭਗ ਦੁੱਗਣਾ ਹੈ।ਕਿਸਾਨਾਂ ਦਾ ਕਹਿਣਾ ਹੈ ਕਿ ਜੇਕਰ ਇਸੇ ਤਰਾਂ ਨਹਿਰੀ ਪਾਣੀ ਮਿਲਦਾ ਰਹੇ ਤਾਂ ਉਨ੍ਹਾਂ ਦੀਆਂ ਫਸਲਾਂ ਚੰਗੀਆਂ ਹੋਣਗੀਆਂ।
ਬਾਕਸ ਲਈ ਪ੍ਰਸਤਾਵਿਤ
ਅਬੋਹਰ ਦਾ ਕਿਨੂੰ ਜਾਂਦਾ ਹੈ ਦੇਸ਼ ਭਰ ਦੀਆਂ ਮੰਡੀਆਂ ਵਿਚ
ਅਬੋਹਰ ਦਾ ਕਿਨੂੰ ਇੱਥੋਂ ਦੇਸ਼ ਭਰ ਦੀਆਂ ਮੰਡੀਆਂ ਵਿਚ ਜਾਂਦਾ ਹੈ। ਧੁਰ ਦੱਖਣ ਅਤੇ ਪੂਰਬੀ ਪ੍ਰਦੇਸ਼ਾਂ ਤੱਕ ਇਹ ਕਿਨੂੰ ਪਹੁੰਚਦਾ ਹੈ। ਇਸ ਲਈ ਜਿ਼ਲ੍ਹੇ ਵਿਚ ਕਿਨੂੰ ਦੇ ਗ੍ਰੇਡਿੰਗ, ਵੈਕਸਿੰਗ ਅਤੇ ਪੈਕਿੰਗ ਲਈ ਛੋਟੀਆਂ ਵੱਡੀਆਂ 500 ਦੇ ਲਗਭਗ ਇਕਾਈਆਂ ਕਾਰਜਸ਼ੀਲ ਹਨ। ਜ਼ਦ ਕਿ ਇੱਥੇ ਇਸ ਰੁੱਤ ਵਿਚ ਦੇਸ਼ ਭਰ ਤੋਂ ਫਲ ਵਪਾਰੀ ਕਿਨੂੰ ਲੈਣ ਪਹੁੰਚਦੇ ਹਨ। ਇਸ ਨਾਲ ਇਕ ਵੱਡਾ ਸ਼ਰਮਾਇਆ ਜਿ਼ਲ੍ਹੇ ਦੇ ਕਿਸਾਨਾਂ ਨੂੰ ਮਿਲਦਾ ਹੈ।
ਸਿਹਤ ਲਈ ਹੈ ਵਰਦਾਨ
ਕਿਨੂੰ ਸਿਹਤ ਲਈ ਵਰਦਾਨ ਹੈ। ਵਿਟਾਮਿਨ ਸੀ ਨਾਲ ਭਰਪੂਰ ਇਹ ਫਲ ਸ਼ਰੀਰ ਦੀ ਰੋਗਾਂ ਨਾਲ ਲੱੜਣ ਦੀ ਸਮਰੱਥਾ ਵਧਾਊਂਦਾ ਹੈ। ਇਸਦੇ ਬੀਜ ਵਿਚ ਲਿਮੋਨਿਨ ਨਾਂਅ ਦਾ ਤੱਤ ਪਾਇਆ ਜਾਂਦਾ ਹੈ ਜੋ ਕਿ ਕੈਂਸਰ ਸੈਲਾਂ ਨੂੰ ਵੱਧਣ ਤੋਂ ਰੋਕਦਾ ਹੈ। ਇਸਦਾ ਜੂਸ ਊਰਜਾ ਦਾ ਵੀ ਉੱਤਮ ਸ਼੍ਰੋਤ ਹੈ। ਇਹ ਐਸੀਡਿਟੀ ਨੂੰ ਰੋਕਦਾ ਹੈ। ਚਿਹਰੇ ਤੇ ਚਮਕ ਲਿਆਉਂਦਾ ਹੈ। ਇਸ ਦੇ ਨਿਯਮਤ ਸੇਵਨ ਨਾਲ ਹਾਰਟ ਅਟੈਕ ਦਾ ਖਤਰਾ ਵੀ ਘੱਟਦਾ ਹੈ।
